Дорноговь аймгийн Замын-Үүдийн боомтоор автобусаар зорчиж, хил нэвтэрсэн ӨМӨЗО-ны иргэн ээж, охин хоёын биеийн байдал тааруу, коронавирусээр халдварласан байж болзошгүй байдалтай байна. Тодруулбал, тус автобусанд 17 иргэн зорчиж явсан бөгөөд ээж, охин хоёр өндөр халуурч байсан учир тусгаарлаж, тандалт хийж байгаа аж. Энэ хүрээнд УБТЗ-ын Замын-Үүд зангилаа өндөржүүлсэн бэлэн байдалд шилжээд байна. 

Тэгвэл  Эрүүл мэндийн яамнаас өнөөдөр шуурхай хэвлэлийн хурал хийлээ.

Энэ үеэр "БНХАУ-ын Эрээн хотоос автобусаар ирсэн зургаан настай охин, ээжийн хамт халуурсан. Тэдний биеийн халууныг үзэж, хяналтад байлгаж байна. Шинжилгээ хийж байна. Одоогоор биеийн байдал гайгүй байгаа. Эрсдэлээс сэргийлэх үүднээс мэдээлэл хийж байна. Автобусанд хамт явсан 17 хүнээс тархвар судлалын асуумж авч байна. 

Яг одоогийн байдлаар БНХАУ-д тус вирусээр 600 хүн халдварлаад байна.

Дэлхий нийтэд улирлын чанартай томуугийн дэгдэлт ихсэж байна. Тиймээс дархлаа дамжиж, ахуйн ариун цэврийг сайтар барих ёстой. Нөгөөтээгүүр, цагаан сар болох гэж байгаа тул иргэдийг сонор сэрэмжтэй байхыг анхааруулж байна" гэлээ.

Г.Маргад