Монгол Улсын гурван сая дахь иргэн таван нас хүрлээ. Тодруулбал, Өмнөговь аймгийн Даланзадгад сумын иргэн Энхтүвшингийн Хатанболд, Ганбатын Аззаяа нарын ууган охин Монголжин 2015 оны нэгдүгээр сарын 24-ний 08.27 цагт мэндэлж, Монгол Улс гурван сая дахь иргэн болсон юм.

Өмнөговь аймгийн Статистикийн хэлтсийнхэн Монгол Улсын гурван сая дахь иргэний мэндэлсэн өдрийг хамт тэмдэглэн өнгөрүүллээ. Энэ үеэр Х.Монголжин “Өнөөдөр би таван нас хүрч байна. Би өөрийгөө гурван сая дахь иргэн гэдгийг мэддэг. Төрсөн өдрөөр маань зөндөө олон хүн ирж бэлэг өгдөг. Бэлэг өгсөн ах, эгч нартаа баярлалаа” хэмээн сэтгэгдлээ хуваалцав.

Х.Монголжин охинтой нас чацуу 180 иргэн байдаг бөгөөд 2019 оны урьдчилсан гүйцэтгэлээр 2020 онд 5 нас хүрэх 79907 хүүхэд байна. Үүнээс эрэгтэй 40917, эмэгтэй 38990 хүүхэд байгаа юм.
Сонирхуулахад, Монгол Улсын нэг сая дахь иргэн 1961 оны аравдугаар сард, хоёр сая дахь иргэн 1988 оны долдугаар сард төрсөн. 1988 онд мэндэлсэн 2 сая дахь иргэнийг Аззаяа хэмээн нэрийдсэн бол 3 сая дахь иргэний ээжийг мөн л Аззаяа гэдэг юм байна.

Г.Маргад