Эрүүл мэндийн сайд Д.Сарангэрэл ХӨСҮТ-д ажиллалаа. Энэ үеэр тэрбээр “Дэлхийн мэндийн байгууллагуудтай өдөрт тутам нягт хамтарч ажиллаж байна. Дэлхий дахинд өчигдөр 10:40 цагт шинэ төрлийн коронавирусийн халдварын тохиолдол 844, нас барсан тохиолдол 17 байсан бол яг одоо халдварын тохиолдол 1,287, нас барсан тохиолдол 41 болж нэмэгдсэн байна. Халдварын тохиолдол илэрвэл шууд зарлаж, яаралтай арга хэмжээ авна. Одоогоор халдвартай тохиолдол бүртгэгдээгүй ч бид халдвар хаалга тогшиж байгаа гэж үзэж байна. Учир нь ийм үед бид хамгийн муу байдлаар дүгнэж, урьдчилан сэргийлэх арга хэмжээгээ сайн авах ёстой. Мөн тэрбээр "Манай лаборатори томуугийн 21 вирусийг оношлох боломжтой. Шинээр үүссэн коронавирусийг оношлоход лабораторийн чадамжгүй байгааг нуухгүй. 21 вирусийн аль нэг нь илрэхгүй бол коронавирусийн сэжигтэй тохиолдол байна гэж үзнэ. Энэ бол бидний хамгийн сэтгэл зовоож байгаа асуудал. Цоо шинэ вирус учраас дэлхий бэлэн биш байна. Оношлуур болон урвалж бодис үйлдвэрлэхээр ажиллаж байна. Гэхдээ Япон улсаас ойрын хугацаанд оношлуур урвалжийг нийлүүлэхээ мэдэгдсэн. Гэхдээ ирэх долоо хоногт манай улс оношлууртай болох юм" гэлээ.

Харин ДЭМБ-ын Монгол дахь суурин төлөөлөгчийн үүрэг гүйцэтгэгч Др.Сергей Диордица "ДЭМБ-аас Монгол Улсад боломжоороо тусална гэж амласан. Сэжигтэй тохиолдол гарвал сорьцоо шуурхай лавлагаа лабораторидоо өгч оношоо баталгаажуулах шаардлагатай. Одоогоор бид оношийг үгүйсгэх байдлаар шинжилгээгээ баталгаажуулаад явж байгаа" гэв.

ХӨСҮТ-ийн Эмнэлгийн тусламж үйлчилгээний төвийн дарга Пунсагийн хэлснээр галт тэргээр зорчсон сэжигтэй долоон тохиолдлыг тусгаарлаж, цаг алдалгүй ажиллажээ. Мөн гурваас дээш зовууртай хүмүүсийг халдварын сэжигтэй гэж үзэн тусгаарласан байна. Тус төвийн лаборатори 21 вирус оношлох боломжтой. Коронавирусийн тохиолдол илэрвэл Японы халдварт өвчний үндэсний төвд шинжилгээгээ явуулах аж. Цаашид нотолгоонд суурилсан онош тавихыг хүсэж байгаа. Бид тус вирусийн идэвхжилтийн энэ үед өндөржүүлсэн бэлэн байдлаа хангаж ажиллах аж.

С.Сүлд