Улсын ерөнхий прокурор Б.Жаргалсайханаас ирүүлсэн саналын дагуу Халдашгүй байдлын дэд хороо хуралдаж, гишүүн Н.Номтойбаярын бүрэн эрхийг түдгэлзүүлэх шийдвэр гаргасан билээ.

Уг шийдвэрийн талаар Халдашгүй байдлын дэд хорооны дарга, Хуулийн сайд Ц.Нямдорж "Прокурорын санал нууцын зэрэглэлтэй, мөрдөн байцаалтын нууцлалтай байгаа учраас хаалттай хуралдаж, шийдвэр гаргалаа. Нэг талаас Н.Номтойбаяр гишүүнийг тойрсон хардлага сэрдлэг их байгаа, нөгөө талаас албан тушаал нь гишүүнийг шалгахад саад болж байна гэх байр суурь байгаа учраас түдгэлзүүлж байгаад шалгуулаад нэрээ цэвэрлээд авчихвал гээд ийм шийдвэрт хүрсэн.

Ерөнхий прокурор дотор нь байгаа асуудлаар нарийн мэдээлэл өгөхгүй байгаа. Нэг зүйлд гишүүд санаа зовниж байна. Гол асуудлаа шалгахгүй тойроод явчих вий. Ерөнхий прокурор санал оруулж ирсэн учраас үүнийхээ хариуцлагыг цаашдаа хүлээх байх" гэсэн байдаг.

Үүнтэй холбогдуулж УИХ-ын гишүүн Н.Номтойбаяр цахим хуудсаараа дамжуулан байр сууриа илэрхийлсэн байна. Тэрбээр "Халдашгүй байдлын дэд хороо хуулийн хүрээнд нотлох баримтад тулгуурлах биш, улс төрийн шийдвэр гаргадаг юм байна. Надад хууль зөрчсөн үйлдэл байхгүй. Одоо Их Хурлыг нээлттэй явуулах хэрэгтэй" гэжээ.

С.Сүлд