Шинэ төрлийн коронавирусийн халдвар дэлхийн олон улсад тархаад байна. Өнөөдрийн байдлаар нас барагсдын тоо 56 хүрсэн гэх мэдээлэл бий.

Тэгвэл энэ сарын 26-ны өдрийн 15.00 цагийн алдад БНХАУ-ын Бугат хотын үйлчилгээний төвд үйлчлүүлж байсан хоёр хятад иргэн ухаан алдаж унажээ. Тухайн иргэд ухаан алдаж унахаасаа өмнө маш хүчтэй ханиалгаж, улмаар таталт өгсөн байна. Уг мэдээллийн дагуу хятадын халдварт өвчинтэй тэмцэх газар, цагдаа, онцгой зэрэг албаныхан ирж, тухайн иргэдийг тусгаарласан бөгөөд Бугат хотын бүх үйлчилгээний газрыг өчигдрөөс эхэлж хаажээ. 

Одоогийн байдлаар шинэ төрлийн коронавирусын халдвар болох нь бүрэн батлагдаагүй ч, сэжигтэй тохиолдол гэж зарлан, эмийн сан, үсчин, дэлгүүр зэрэг бүх үйлчилгээг зогсоож,  иргэдийг гэрээсээ гарахгүй байхыг анхааруулж байгаа аж. 

БНХАУ-ын Бугат хотод Монгол Улсын 100 гаруй иргэн ажиллаж, амьдардагаас 50 гаруй залуус их, дээд сургуульд суралцдаг гэх албан бус тоо бий. 

Эдгээр оюутнуудын олонх нь Монголд ирсэн бол зургаан оюутан ажил хийхээр үлдсэнээс хоёр нь Бугатад ажиллахаа үлдсэн бол бусад дөрөв нь Гуанжуд ажиллахаар явсан байжээ.

Үүнээс өмнө Хөххот, Шилийн гол зэрэг хотуудад дээрх вирусын тохиолдол бүртгэгдсэн. Тэгвэл Хөххотоос Монгол руу нисэх бүх нислэг цуцлагдсан байна. БНХАУ-ын Бугат хот нь Хөххотоос цааш 100 гаруй км-ын цаана байрладаг. Тэндээс Монгол руу ирэхийн тулд заавал Хөххотоор дамжин ирэх ёстой.

Энэ утгаараа Бугат хотод ажиллахаар үлдсэн Монгол оюутнуудад эрсдэл үүсэхгүй гэх баталгаа байхгүй.

Тиймээс Гадаад харилцааны яамнаас эдгээр оюутнуудын аюулгүй байдлыг хангах асуудлаар тодруулж тун удахгүй хүргэх болно. 

Г.Маргад