УИХ дахь МАН-ын бүлэг сонгуулийн тойргийн хуваарилалт, мандаттай холбоотой асуудлаар хуралдах гэж байна. Энэ талаар Бүлгийн дарга Д.Тогтохсүрэн “Бүлгийн хуралдаанаар тойрог байгуулах, мандат хуваарилахтай холбоотой асуудлыг хэлэлцэнэ. Мөн аймаг нийслэл ИТХ-ын Сонгуулийн тухай хуулийг хэлэлцэж байгаатай холбогдуулан зарим заалтыг хэлэлцэнэ. Үүний зэрэгцээ УИХ-ын гишүүн Н.Номтойбаярын бүрэн эрхийг түдгэлзүүлэх эсэх асуудлыг хэлэлцэнэ. УИХ-ын Халдашгүй байдлын дэд хорооны дүгнэлт гарсан. Үүнийг Бүлгийн хуралдаанаар сонсоно. Өмнө нь хэлэлцүүлэг явуулчихсан. Одоо бол эцсийн шийдвэрийг гаргана гэж ойлгож болно.

Хотын тойргоос дөрвөн мандатыг хасна. Хот 28 мандаттай байна. Үүнийг 24 болгохоор ярьж байна. Сонгуулийн тухай хуульдаа олон мандат бүхий томсгосон тойргоор явуулна гэж заасан. Нэг тойрог хоёр ба түүнээс дээш мандаттай байх зайлшгүй шаардлага бий болсон. Хотоос дөрвөн мандатыг авч Дундоговь, Булган, Сүхбаатар, Говь-Алтай аймагт нэмж байна. Говьсүмбэр аймгийг Дундговь аймагтай нэгтгэнэ.

Баянзүрх, Сонгинохайрхан дүүргүүдийг тус бүрт нь хоёр тойрог болгох асуудал яригдаж байгаа. Бүлгийн хуралдаанаар эцэслэнэ. Хоёулаа таван мандаттай болчихоод байгаа юм. Баянзүрх дүүрэг 361 мянган хүн амтай. Сонгинохайрхан дүүрэг 330 орчим хүн амтай байна. Нэг нэр дэвшигч 300 мянган хүнд хүрч ажиллана гэдэг хэцүү. Сонгогчдод хүрч ажиллах байдлыг нь харгалзан үзнэ” гэлээ.

С.Сүлд