Монголын хөлбөмбөгийн холбооны Үндэсний шигшээ багийн ахлах дасгалжуулагчийн түр орлон гүйцэтгэгчээр Серб мэргэжилтэн Войслав Бралушичийг томилсон байна. Түүний хувь найман жил манай улсад ажиллаж байгаа бөгөөд энэ хугацаанд "Эрчим", "Дэрэн", "Андууд Сити" зэрэг клубт ажиллаж байсан юм. Мөн Монгол Улсын 15 хүртэлх насны шигшээ багийн дасгалжуулагчаар ажиллаж байв.

Войслав Бралушич гэж чухам хэн бэ. Войслав Бралушичийн ширүүн догшин авир, араатан мэт ааш, доромжлолыг тэсч чадаагүй хүүхдүүд шигшээ багийг орхин гарсан нь саяхан. Үүний дүнд Монгол Улсын 15 хүртэлх насны шигшээ баг 2016 оны Азийн аварга шалгаруулах тэмцээний эрхийн төлөөх тэмцээний хүрээнд нутагтаа Японы багт 0:17, Хонгконгын багт 2:5-аар хожигдсоноор хөгжөөн дэмжигчдийнхээ урмыг хугалж байлаа.

Войслав Бралушич нь 2012 оны зун Шведэд болсон “Гёте кап” тэмцээнд “Дэрэн” клубийг удирдан оролцсон билээ. Гэсэн ч биеэ барьж чаддаггүйгээсээ болоод монгол хүүхдийг барьж авч зодсон нь гадныхны анхааралд өртсөнөөр тус улсыг орхин гарахаас өөр аргагүй болсон тохиолдол ч бий.

Монголын хөлбөмбөгийн холбооны Гүйцэтгэх хорооны дэргэдэх Онцгой байдлын хороо хуралдаж, “Дэрэн” клубийн ахлах дасгалжуулагчаар ажиллаж байсан Войслав Бралушичийн Монголын хөлбөмбөгийн холбооноос зохион байгуулах тэмцээн уралдаанд оролцох эрхийг нь зургаан сараар хасч, мөнгөн торгууль ногдуулсан удаатай. Хэдийгээр арга барил, өндөр туршлагатай нэгэн ч Монголын хөлбөмбөгийн холбооноос гаргасан дүрэм журмыг удаа дараа зөрчиж, байнга шахуу асуудал тарьж байдгийг олон хүн өгүүлдэг юм.

Б.Жаргал