Засгийн газраас БНХАУ-д гарсан коронавирусийн дэгдэлттэй холбогдуулан “Монгол, Хятадын хилийн боомт, тэдгээрийн тухай Монгол Улсын Засгийн газар, Бүгд найрамдах Хятад улсын Засгийн газар хоорондын хэлэлцээр”-ийн 7 дугаар зүйлд заасны дагуу хоёр улсын хилийн боомтуудаар зорчих иргэдийн хөдөлгөөнд түр хугацаагаар хязгаарлалт хийх шийдвэр гарсан.
Үүнтэй холбогдуулан өнөөдрөөс эхлэн хоёр улсын автозамын боомтуудаар БНХАУ руу албан ажлаар болон тус улсаар дамжин гуравдагч улс руу зорчих иргэдийг албан байгууллагын шийдвэр, томилолт, аяллын тийз хөтөлбөрийг үндэслэн дараах хязгаарлалтыг хийх аж.
Тодруулбал, Хятадын талд автомашинаа орхисон нүүрс тээврийн жолооч нарыг харьяалах аж ахуйн нэгж, компанийн албан бичгийг үндэслэн, эрдэс баялаг тээврийн автомашинуудын зөвхөн үндсэн жолоочийг нэвтрүүлнэ. Харин хувийн хэргээр зорчих иргэдийг улсын хилээр нэвтрүүлэхгүй.
