МХЕГ-аас коронавирусийн сэжигтэй тохиолдлыг хил дээр хэрхэн илрүүлж ажиллаж байгаа талаар цаг үеийн мэдээлэл өглөө.

Тусг газраас өгсөн мэдээллээр "Нөхцөл байдал хүндрээд, өвчлөл нас баралт хөрш оронд их байгаа учраас өндөржүүлсэн байдалд шилжсэн. Хил дээр 450 байцаагч ажиллаж байгаагийн 100 гаруй нь эрүүл ахуйн байцаагч байна. Өнгөрсөн хугацаанд 13 сэжигтэй тохиолдол гарсны долоог манай хилийн мэргэжлийн хяналтын алба илрүүлсэн. Мэргэжлийн хяналтын байгууллага ДЭМБ-ын зөвлөмж болон олон улсын дүрмийг баримтлан ЭМЯ-тай нягт хамтран ажиллаж байна.

Хил дээр иргэдээс 14 асуулттай асуумж авч, хоёроос дээш сэжигтэй тохиодол гарвал түр тусгаарлаад шаардлагатай тохиолдолд эмнэлгийн байгууллагад хандаж байна. Бидний зүгээс зорчигчдод голомттой бүс нутаг руу зорчихгүй байх гол зөвлөмжийг өгч байгаа. Өчигдөр Хонг Конгоос ирсэн халуунтай зорчигчдыг онгоцонд явсан бусад 140 хүнээс тусгаарлаж арын суудалд амны хаалттай суулгаад ирсэн. ДЭМБ-ын хавьтлын тодорхойлолтоор бусад зорчигчдыг эрсдэлгүй гэж үзсэн бөгөөд эрүүл мэндийн асуумж, бусад холбогдох мэдээллийг авсан байгаа" гэв.

Сэжигтэй тохиолдол гэдэг нь халдвараар өвчилсөн хүмүүстэй ойр харилцсан, өвчний голомтот нутгаар халдвар бүртгэгдсэнээс өмнөх 14 хоног болон халдвар гарсан хугацаанд байсан амьсгалын замын өвчтэй хүнийг хэлдэг аж.

Харин хавьтал гэдэг нь хамгаалах хэрэгсэлгүйгээр эмнэлгийн тусламж үзүүлсэн эмч болон нэг гэрт хамт амьдардаг хүмүүсийг хэлдэг байна. Тиймээс онгоцонд зорчиж ирсэн иргэдийг сэжигтэй тохиолдол болон хавьталд хамааруулахгүй гэдгийг ХӨСҮТ-аас анхаарууллаа.

С.Сүлд