Францын нийслэл Парис хотод жүдо бөхийн их дуулга тэмцээн ирэх сарын 8-9-нд болно. Энэ оны анхны их дуулгад 122 орны нийт 798 (эрэгтэй 476, эмэгтэй 322) жүдоч өрсөлдөхөө мэдүүлсэн бол манай улсаас 20 бөх зодоглохоор болжээ.

Тэмцээний эрэгтэйчүүдийн 60 кг-ын жинд гавьяат тамирчин Д.Амартүвшин, Л.Өнөболд, 66 кг-д Г.Хэрлэн, Ё.Басхүү, 73 кг-д гавьяат тамирчин Г.Одбаяр, Ц.Цогтбаатар, 81 кг-д О.Ууганбаатар, Н.Дагвасүрэн, 90 кг-д Г.Алтанбагана, -100 кг-д Л.Отгонбаатар, +100 кг-д Хөдөлмөрийн баатар, гавьяат тамирчин Н.Түвшинбаяр, Ө.Дүүрэнбаяр нар барилдахаа мэдүүлсэн байна. Харин эмэгтэйчүүдийн 48 кг-ын жинд гавьяат тамирчин М.Уранцэцэг, Г.Наранцэцэг, 52 кг-д Л.Сосорбарам, Б.Хорлоодой, 57 кг-д Хөдөлмөрийн баатар, гавьяат тамирчин Д.Сумъяа, 63 кг-д Б.Ганхайч, 70 кг-д Ц.Наранжаргал, -78 кг-д О.Мөнхцэцэг нар зодоглох юм байна.

Монголын баг тамирчид их дуулгаас 24 алт, 32 мөнгө, 56 хүрэл медаль хүртэж байв.

Б.Жаргал