УИХ-ын гишүүн Н.Учрал Англи улсад хоёр дахь мастераа хамгаалжээ. Тэрбээр энэ талаар өөрийн цахим хуудастаа "Англид хоёр дахь сургуулиа төгсөөд төгсөлтийн баяртаа оролцоод итгэл дүүрэн, сэтгэл өөдрөг байнаа, Би.

Суралцах үйл явц бүхэн өөр өөрийн гэсэн өнгө аястай. 2007 онд Малайз улсын дэлхийн 8 улсад салбартай Лимкоквинг /www.limkokwing.net/ их сургуулийг зорьж foundation курсэд сууж үргэлжлүүлэн тус сургуулийн Лондон хот дахь салбарт шилжин суралцаж Англид хос дипломтой төгсөж байлаа. Харин 2 жилийн өмнө хэдийгээр төрийн түшээ болоод удаагүй байсан ч цагийн менежментдээ найдан Их Британий их сургуульд 2 дахь удаагаа мастер хамгаалах зорилгод хөтлөгдөн Букингхамын их сургуульд ( www.bucks.ac.uk) элссэн маань "Олон улсын менежментийн мэргэжил" эзэмшихийг зорьсоноос гадна диссертацийн маань кейс болсон "Oxfam" /www.oxfam.org.uk/хүмүүнлэгийн байгууллагын сонирхолтой менежментийг судлахад оршиж байсан юм.

Өмнө нь МУБИС болон Англид мастераа, ОХУ-ын ШУА-ын Сибирийн салбарт докторын зэргээ хамгаалахдаа би жирийн нэг оюутан, цүнхээ үүрээд л хичээлээ бэлдээд төгсөж байсан бол энэ удаад танхимын хичээлд бүтэн цагаар заавал суухгүйгээр онлайн сургалтын хөтөлбөрөөр боловсролын зэргээ ахиулж байна. Улсын Их Хурлын Цахим бодлогын түр хорооны даргын хувьд цахимаар шууд хичээлээ аваад, даалгавар бие даалтаа цахимаар өгч, диссертациа ч цахимаар удирдагч багштайгаа харьцаж бичиж цахимаар сурж болдогийг өөрөөрөө үлгэрлэв. Дипломын хамгаалалтаа өөрийн биеэр хамгаалж судалгааны ажилдаа эзэн нь байж үр дүнд хүрлээ.

Бүх л зүйл орон зайнаас үл хамааран хийж болох шинэлэг сургалтын хэлбэрээр суралцах гарц байгааг, дэлхий хавтгай болсоныг залуучууддаа ойлгуулахыг эрмэлзсэний үр дүн гарлаа. Дипломын удирдагч багш Paul Dudley танд талархаж байна. Боловсролын бүх түвшний хөгжлийн загварыг тодорхойлох алсын хараанд хүч нэмсэн алхам миний гадаад, дотоодод хамгаалсан 4 дахь магистрын зэрэг байлаа. Илүү хичээх болно. Дэлхий хавтгай болжээ.

Их британий хуулийн дагуу тус улсад мастер, докторын зэрэг хамгаалсан бол 2 жил ажиллах эрх өгдөгийн адил надад 2 дахь удаагаа энэ эрх нээгдэж байна. Гэхдээ би түмний төлөөх үйлсдээ эх орондоо хүчин зүтгэж олон улсын түвшний боломжуудыг залуустаа олгох ёстой, зон олны төлөөх зорилготой хүн билээ" гэжээ.