“Гэртээ уйдаж үхлээ. Гадаа жаахан сагс тоглочих уу”, “Тэгье л дээ, харин бөмбөг хэнээс авах юм”, “Ганаад байгаа гэсэн. Тэдний гэрийн урд талбайд жаахан тоглочихъя. Гялзахгүй бол ээж дуудаад унана. Чи маскаа яасан юм. Багш харчих вий дээ” гэсэн яриа хөврүүлсээр гурван хүү урд алхаж байна. Байр байдлыг нь ажиглаваас дунд ангийн сурагчид гэлтэй.

Амралтын хоёр өдөр хүртэл 20 хоног шиг л санагддаг хүүхдүүдэд арванхоёрдугаар сарын 20-ноос эхлэн урт амарсан учир уйдсан нь гарцаагүй. Гэрээсээ ч хэр барагтай гараад байдаггүй бололтой. Ярианаас нь сонсоход тэр. Тэдний нэг нь санаа зовсон байртай “Хөгшөөн хичээл орохоор долоо хоног бүрийн хагас сайн өдөр хичээл орох юм ярьж байна лээ” гэтэл бусдаасаа арай өндөр, хэрцэнхий хүү нь “Хэн тэгж байна, би лав сонсоогүй юм байна” гэх зэргээр элдвийг хөөрөлдөнө.

Тэд ийн ярьсаар Улаан худаг гэж нэрийдэх өндөр улаан байшингийн ойролцоох саадны зүг одлоо. Сурагчдын нэг нь л масктай байсан бөгөөд маскаа эрүүн доогуураа шургуулжээ. Замын-Үүдийн нэгэн өдөр ийн үргэлжилнэ.

Замын-Үүдэд маскны хомсдол үүсчээ

Энд хаврын урт өдөр иржээ. Гадаа тогтуун, дулаахан байна. Замын-Үүд БНХАУ-ын Эрээн хоттой хил залгадаг учраас хот, хөдөөгийн хүмүүс их холхино. Хүн амын тоо нь 20 мянга хол давсан уг сум жилээс жилд л өнгөлөг сайхан болсон санагдана. Өмнө нь жуулчны бааз гэх газар төвөөсөө зайтай мэт санагддаг байсан бол одоо айлуудтай нийлэх шахам болжээ.

Дэлхий нийтээр коронавирусийн халдвартай хэрхэн тэмцэх, урьдчилан сэргийлэх талаар эрвийх дэрвийхээрээ ажиллаж, бас сандарч байхад халдвар гарсан Эрээн хоттой хил залгаа энэ сум, иргэд их л тайван харагдана. Маск зүүсэн хүн ч цөөн байна. Иргэдийн ярьж байгаагаар анх халдвар гарсан гэх гурван хоногт хүн бүр маск зүүж, сандралдаж байжээ. Зарим нь Монголын хууль гурав хоногтоо юм байна шүү дээ гэх.

Нэг талаар иргэдийн анхаарал суларчээ. Энэ задгайрсан байдлыг маскны хомсдолтой холбон тайлбарлах хүн ч байсан юм. Тэдний хэлж байгаа үнэн эсэхийг харах гэсэн шиг төвийн хэсэгт байрлах хоёр ч эмийн сангаар орж үзэхэд нээрээ л нэг удаагийн амны хаалт байсангүй. Дууссан гэнэ. Эмийн сангийн гадаа зогсож байсан хижээлдүү насны хүнээс ойр хавьд маск зарж байгаа газар бий болов уу гэж асуухад “нэг удаагийн маск лав олдохоо байсан. Байгаа нэг нь үнийг нь нэмээд 500 төгрөгөөр зардаг. Утаа шүүгчтэй маск 2500 төгрөг байснаа нэмэгдсээр 4500 төгрөг болсон байна лээ” гэсэн юм.

Албан байгууллагуудын зүгээс ажилчдаа маск, гар ариутгагч тарааж, маскгүй иргэдийг дотогш нэвтрүүлэхгүй байгаа гэсэн. Замын-Үүдийн вокзалд Эрээн рүү хүн авч гарна гэж язагнадаг машин алга болж, хот хооронд хүн тээвэрлэдэг машин эрс цөөрчээ. Тэд өвчин гарсан тул хүн суулгахын оронд ачаа тээвэрлэдэг болсон аж.

Энд ОБЕГ-ын тэргүүн дэд дарга, бригадын генерал Г.Ариунбуянгаар ахлуулсан тусгай комисс ажиллаж байгаа бөгөөд Замын-Үүдэд хөл хорио тогтоох хүртэл асуудал яригдсаныг сонслоо. Эл явган яриатай зэрэгцэн зарим нь энд ингээд түгжигдэх нь дээ гэх нь ч сонстоно.

Ерөнхий боловсролын III сургуулийн спорт заалыг тусгаарлах байр болгожээ

Засгийн газрын шийдвэрээр багш нарыг цалинтай амраахаар шийдвэр гарсан. Харин Замын-Үүдийн багш нарын хувьд хүүхдүүдэд коронавирусээс урьдчилан сэргийлэх зөвлөмж тарааж, теле хичээл үзсэн, даалгавраа хийсэн хүүхдүүдийн тоог аймгийн хэмжээнд нэгтгэн гаргахаар ажиллаж байгаа гэсэн юм.

Мөн сумын Нэгдсэн эмнэлэг иргэдэд үйлчилгээ үзүүлэхдээ урьдаар халуун хэмжигчээр халууныг нь хэмжиж, халуурсан иргэдийг үзлэг оношилгоонд хамруулах зэрэг арга хэмжээ авч ажиллаж байгаа бөгөөд эмнэлгийн тусламж үйлчилгээ авах иргэдийг утсаар дуудлага өгөхийг зөвлөж байгаа гэсэн. Мөн Замын-Үүд сумын ерөнхий боловсролын III сургуулийн спорт заалыг тохижуулж, хэрэв халдвар гарвал тусгаарлан эмчилгээ хийхээр бэлтгэжээ.

Хил залгаа Эрээн хотод коронавирусын халдвар гарч түм түжигнэж байхад энд иргэдийн байгаа байдлаас харахад урьдчилан сэргийлж байгаа байдал нь арай л сул санагдлаа. Гэхдээ л манай улсад энэ халдвар нэг л гарвал эмнэлгийн байгууллага ачааллаа дийлэхгүй, эмчилж чадахгүй гэдгийг мэргэжилтнүүд анхааруулсаар байгааг санаж явахад илүүдэхгүй биз ээ.

Б.Лхам