“Алсын хараа-2050” бодлогын баримт бичгийг АН-ын дарга С.Эрдэнэд гардуулан өглөө.

Энэ талаар ЗГХЭГ-ын дарга Л.Оюун-Эрдэнэ “Олон улсад нээлттэй харилцаанд АН-ын оруулсан хувь нэмэр маш их. Энэ 30 жилийг монголын ард түмэн хамтдаа тэмдэглэж байгаа энэ үед 30 жилийг бүхэлд нь дүгнэж, төсөөлсөн “Алсын хараа-2050” бодлогын баримт бичгийг Засгийн газраас 1500 гаруй эрдэмтэн судлаачидтай хамтарч боловсрууллаа. Өнөөдөр УИХ-д албан ёсоор өргөн барьж, парламентад суудалтай намуудтай хэлэлцүүлэг хийж, зөвшилцөх нь зүйтэй гэж үзэж байна. Тиймээс бодлогын баримт бичгийн дээжээс танд гардуулан өгч байна. Шинэ зүйл гэхээс илүү хэрхэн тогтвортой хөгжлийг хангах үзэл санаанд тулгуурлаж 9 бүлэгтэй хийлээ. Дундаж давхаргаа дэмжсэн, уул уурхайгаа төрөлжүүлэн хөгжүүлэх 30 жил байх юм байна. Энэ талаар хаа хаанаа бодох ёстой гэдэг асуудлаар эрдэмтэд хөндсөн” гэлээ.

АН-ын дарга, УИХ-ын гишүүн С.Эрдэнэ “Дэлхийн бусад улсуудад 2050 оныг төсөөлж, хөгжлийн нэгэн хэмжүүо болгон авч үзэж байгаа. Манай улсад ч гэсэн эрдэмтэн мэргэдийн оролцоотойгоор авч үзсэн нь тодорхой дэвшил гэж харж байна. Ардчиллын хоёр дахь 30 жилийнхээ төлөвлөлтийг гаргахаар АН-ын зүгээс ч тэр ажиллаж байна. Үүнд та бүхнии гаргасан ном хэрэг болох байх. Гэхдээ хоёр монгол байхгүй шүү дээ. Бид нэгдсэн нэг бодлоготой байх ёстой. Энэ баримт бичиг монголын нийт ард түмэнд хэрэгтэй гэж ойлгож байгаа шүү” гэдгийг онцолсон юм.

Б.Лхам