УИХ-ын гишүүн, АН-ын дарга С.Эрдэнийг яллагдагчаар татах саналаа АТГ-аас прокурорт дахин хүргүүлсэн тухай өдөр тутмын Өнөөдөр сонин мэдээлжээ. Түүнийг Нийгмийн даатгалын сангийн хөрөнгийг буцаан төвлөрүүлээгүй, бусдад давуу байдал олгож, их хэмжээний хохирол учруулсан хэрэгт яллагдагчаар тооцон шалгах санал АТГ-гаас гаргасан гэнэ. С.Эрдэнийг Хүн амын хөгжил, нийгмийн хамгааллын сайд байхад нь НДЕГ-ын даргаар ажиллаж байсан Ц.Уртнасан, Ц.Уртнасан, Санхүү, бүртгэлийн газрын дарга асан Ч.Чулуунчимэг нарыг АТГ-аас саатуулж, цагдан хориод байгаа юм. Тэднийг 

НДЕГ-ын харилцах дансны жилийн эцсийн үлдэгдлийг Нийгмийн даатгалын санд буцаан төвлөрүүлээгүй, “Капитал” банканд давуу байдал олгож тус сангийн хөрөнгийг шамшигдуулсан гэх хэрэгт холбогдуулан яллагдагчаар тооцон шалгаж байгаа юм. Тэгвэл уг хэрэгт холбогдуулан С.Эрдэнийг шалгахаар болсон бололтой.

АН-ын дарга С.Эрдэнийг яллагдагчаар татах саналаа АТГ-аас хоёр дахь удаагаа прокурорт гаргаж байгаа юм. Энэ оны нэгдүгээр сард уг саналаа прокурорт хүргүүлсэн ч зарим зүйлийг тодруулах шаардлагатай гээд зохих ажиллагаа хийлгэх даалгавар бичин буцаасан байдаг. Тухайн үед УИХ-ын гишүүн С.Эрдэнийг “Дархан гурил тэжээл” ХК-ийн хуучин элеваторыг Хөгжлийн банкны хөрөнгөөр засаж улсад хохирол учруулсан гэх хэрэгт холбогдуулан яллагдагчаар татах саналаа прокурорт хүргүүлж байсан билээ. 

С.Сүлд