“Exclusive” компанийн захирал Г.Майцэцэг үндэсний үйлдвэрлэгчдийг дэмжих замаар улс орны хөгжилд хүргэх боломжтой гэдгийг уриалж, дуу хоолойгоо хүргэсээр ирсэн. Гэвч түүний үг, үйлдэл заримдаа хэт хол зөрөх болсноор тэрбээр үнэхээр ЖДҮ-чин үү, эс бөгөөс попчин нэгэн үү гэж гайхширахад хүргэх болоод удаж буй.

Бондоос авсан зээлээ зориулалтын бусаар ашигласан, зээлээ эргэн төлөөгүй гэх шуум тарахтай зэрэгцэн өөрийн компанийн урласан бүх хувцсаа үнэ төлбөргүй тараана гэж баахан сенсаац тарьсан.

Гэвч хувцсаа тараасан ч юм байхгүй Улаанчулуутын хогийн цэг дээр аваачиж шатаана гэж бондын өрөө “цайруулах шантааж” хийсэн ч хувцас тараасан, бүр шатаасан ч юмгүй таг болсон. Үүний дараагаас үе үехэн элдэв поп, хэл амтай мэдэгдэл хийх болсон тэрбээр цахим орчинд багагүй идэвхтэй байж, зарим үед бусадтай хэл ам зөрөлдөх нь цөөнгүй. Тэгвэл энэ сарын 13-нд УИХ-ын дэд дарга Л.Энх-Амгалан “Exclusive” компанийн захирал Г.Майцэцэгийн талаар дуулиан тарьсан мэдэгдлийг цахим хуудсаараа дамжуулан хийлээ.

Тодруулбал, УИХ-ын дарга Л.Энх-Амгалан нь “Exclusive” компанийн захирал Г.Майцэцэгт үйлдвэр байгуулахад нь дэмжлэг үзүүлэхээр хувиасаа хүүгүй, барьцаагүй 60 сая төгрөг зээлжээ. Гэвч уг мөнгийг тэрбээр өнөө хүртэл эргэн төлөөгүй бөгөөд харин ч өөрийгөө ашиглуулсан гэдгийг хариу өчсөн байна.

Ингээд УИХ-цын дэд дарга Л.Энх-Амгалан өөрийн цахим хуудастаа бичсэн мэдэгдлийг хүргэе.

“Хүний итгэлийг алдах мөнгө алдахаас хэцүү ...
Хөвсгөл аймгийн Мөрөн хотод 50-60 хүнтэй оёдлын цех байгуулах, ажлын байр гаргах саналыг хүлээн авч “Exclusive” компанийн захирал Г.Майцэцэгт 2018 оны тавдугаар сард 60 сая төгрөгийг  зургаан сарын хугацаатай, хүүгүй, хувиасаа зээлдүүлсэн боловч зээлээ төлөлгүй хоёр дахь жилийнхээ нүүрийг үзэж байна. Өнөөдөр “Мөнгөө шүүхээр нэхэмжлэлээ” гэж цахим орчинд нилээн их дайрч, доромжиллоо. Хэрвээ энэхүү санхүүжилт хэрэгтэй эзэндээ очсон бол, жинхэнэ утгаар нь ашигласан бол бага ч гэсэн амжилт олж болох байсан.

Энэ хүн "Төрсөн нутагт чинь үйлдвэр барина. Ажлын байр бий болгоно. Туслаач, дэмжээч гэж олон өдөр шалж, намайг тэнгэрт тултал магтаж, ээрсэн хүн дээ.

Хувиасаа хүүгүй, барьцаа авалгүй мөнгө зээлдүүлчихээд, зээлүүлсэн хүндээ муу хэлүүлээд суудаг над шиг тэнэг хүн хорвоод ховор биз. Алдсан хүн арван тамтай гэдэг. Холбогдох хуулийн дагуу зээлийн гэрээ хийж хоёр тал тамга гарын үсгээр баталгаажуулсан учраас нэхэмжлэгчийн хувьд ямар нэгэн хууль зөрчсөн зүйл байхгүй. Манай нутгийнхан “Хөх сувд” брэндийн хувцасны үйлдвэртэй болох юм байна. Ядаж сурагчийн дүрэмт хувцсаа аймагтаа үйлдвэрлэх боломж нээгдэх юм байна гэсэн сайхан итгэлээ алдсан. Хүний итгэлийг алдахгүй байх нь мөнгөнөөс илүү үнэ цэнэтэй. Өнөөдөр ЖДҮ-ийн зээл жилийн 3-8 хувийн хүүтэй. Гэрээнд тусгагдсан 0,5 хувийн алдангаа тооцолгүйгээр зүгээр л анх байгуулсан оёдлын цех, тоног төхөөрөмжөө ажилтай, орлоготой болно гэж итгэж найдаж байсан нутгийн оёдолчдод хүлээлгэж өг. Тэгвэл өр цайрна. Хүний итгэлийг алдах мөнгө алдахаас хэцүү” гэжээ.

Харин үүний хариуд “Exclusive” компанийн захирал Г.Майцэцэг “Ийм увайгүй... ашиглаад хаядаг гондом биш шүү.

Улстөрчид өөрсдийнхөө “пи ар” суртчилгаанд үйлдвэрлэгчдийг ашиглаад хаядаг жишгийг чинь таслан зогсоох болно... Хорсолтойгоор хэлчихье... Нүдээ нээх цаг болсон”, Ийм л юм болчихлоо. Зээл байсан юм бол хувиасаа гаргаж энэ тэр. Интертайнмэнт хийх хэрэггүй байсан юм” гэжээ.

Дээрх мэдэгдлийн араас хэн нь үнэн, хэн нь худал хэлснийг хэлэх боломжгүй ч хэрвээ иргэн Г.Майцэцэг бусдаас зээлсэн мөнгөө үнэхээр эргүүлж төлөөгүй бол бизнесийн талбарт түүний нэр хүнд унаж, найдваргүй зээлдэгч гэдгээ баталж мэдэх нь. Харин эсрэгээрээ бол Л.Энх-Амгалан гишүүн сонгууль угтсан "пи ар" хийсэн гэх хэл аманд орохыг үгүйсгэхгүй юм. 

Г.Маргад