Засгийн газрын 2019 оны 280 дугаар тогтоолоор “Чингис хаан музей” байгуулахаар шийдвэрлэсний дагуу Боловсрол, соёл, шинжлэх ухаан, спортын сайдын 2020 оны А/36 дугаар тушаалаар тус музейн дүрэм батлагдан ашиглалтын өмнөх захиргааны чиг үүргийг “Чингис хааны өв, соёлын хүрээлэн” хариуцан ажиллаж байна.
Чингис хаан музей нь Хүннү гүрнээс эхлээд Их Монгол улс, Монголын Эзэнт гүрэн, ХХ зууны Монгол хүртэлх хаад, язгууртны түүх, өв соёлыг дэлгэн харуулсан үзмэрийн 15 танхим бүхий олон улсын стандартад нийцсэн музей байх юм.
Ийнхүү их эзэн Чингис хааны түүхэн музей байгуулагдаж байгаатай холбогдуулан “Чингис хаан музейн-лого болон брендбүүк бүтээх” уралдааныг нийт дизайнер, зураач, уран бүтээлчдийн дунд нээлттэй зарлаж байна.
Шаардлагад дүрслэл, агуулга санаа нь бүх насны хүмүүст ойлгомжтой энгийн байх, олон нийтийн сэтгэлд нийцсэн, хүлээн зөвшөөрөгдөхөөр байх, утга, агуулга, уран сайхны хувьд зохицолдсон байх, график дизайныг мэргэжлийн программ дээр хийсэн байх, өндөр нягтралтай (300 dpi-аас багагүй) байх бөгөөд жижгээс том руу хувиргахад харьцаа алдагдахгүй үндсэн элементүүд тод харагдахаар байх, хар, цагаан болон өнгөт, өнгөгүй гадаргуу дээр хэвлэгдэхэд тохиромжтой байх, бүтээлийн тайлбарыг хавсарган ирүүлэх, уралдаанд нэг оролцогч хэдэн ч загвараар оролцож болох аж.
БРЭНДБҮҮК нь албан бичиг /бланк/, нэрийн хуудас, дугтуй, календар, тэмдэглэлийн дэвтэр, үзэг, бал , туг, дарцаг, CD ковер, цаасан хайрцаг, уут , яга, түлхүүрийн оосор... гэх мэтэд ашиглагдаж болох юм байна.
Оролцогч овог нэр, холбоо барих утасны дугаар, ажлын болон оршин суугаа хаягаа уралдаанд ирүүлж буй бүтээлийнхээ тайлбар хэсэгт тодорхой бичсэн байх ёстой.
Материалыг энэ сарын 14-ний өдрөөс гуравдугаар сарын 02-ны өдөр хүртэл хүлээн авах бөгөөд ihfo@chinggisinstitute.gov.mn цахим хаягаар болон Сүхбаатар дүүрэг, Сүхбаатарын талбай, Сити тауэр оффис 16-02-01 тоот, БСШУСЯамны харьяа Чингис хааны өв, соёлын хүрээлэнгийн байранд хүлээн авах аж.
Тэргүүн байрт шалгарсан бүтээлийг 5 сая төгрөг, тусгай байрт орсон шагналыг 2.5 сая төгрөгөөр тус тус шагнана.
