ҮСХ-оос өнгөрсөн сарын нийгэм, эдийн засгийн байдлын талаар мэдээлэл хийлээ.

Тодруулбал, өнгөрсөн нэгдүгээр сард бүртгэгдсэн гэмт хэрэг 3474 болж, өмнөх оны мөн үеэс 353 буюу 9.2 хувиар буурсан байна. 16 ба түүнээс дээш насны 10.000 хүнд ногдох гэмт хэрэг улсын дунджаар өнгөрсөн сард 16 болж, өмнөх оны мөн үеэс 2 буюу 11.1 хувиар буурсан байна. Нийт гэмт хэрэг өмнөх оны мөн үеэс буурахад өмчлөх эрхийн эсрэг гэмт хэрэг 141, хүний бэлгийн эрх чөлөө, халдашгүй байдлын эсрэг гэмт хэрэг 116, залилах гэмт хэрэг 98, хулгайлах гэмт хэрэг 55, хүний эрүүл мэндийн халдашгүй байдлын эсрэг гэмт хэрэг 52, хүний амьд явах эрхийн эсрэг гэмт хэрэг 31, гэр бүлийн хүчирхийлэл үйлдэх гэмт хэрэг 30-аар буурсан нь голлон нөлөөлсөн байна.

Согтуугаар үйлдсэн гэмт хэрэг нэгдүгээр сард 147 болж, өмнөх оны мөн үеэс 29 буюу 16.5 хувиар, мансуурсан үедээ үйлдсэн хэрэг 17 болж, 3 буюу 15 хувь, гэр бүлийн хүчирхийллийн улмаас үйлдэгдсэн хэрэг 92 болж 25.8 хувиар буурчээ.

Улсын хэмжээнд өнгөрсөн сард 7.2 мянган хүн эрүүлжүүлэгдэж, 974 хүн баривчлагдсан нь өмнөх оны мөн үеэс эрүүлжүүлэгдсэн хүн 3.2 мянга буюу 31 хувиар буурч, харин баривчлагдсан хүн 322 буюу 49.4 хувиар өссөн байна.

Авлигатай тэмцэх газрын Мөрдөн шалгах хэлтэст нэгдүгээр сард 71 хэрэг бүртгэгдсний 56 нь авлигын гэмт хэрэг байна. Бүртгэгдсэн 56 авлигын хэргийн 40 нь эрх мэдэл, албан тушаалын байдлаа урвуулан ашиглах, 8 нь хахууль авах, 1 нь үндэслэлгүй хөрөнгөжих болон хахууль өгөх, 6 хуулийн этгээдийн эрх мэдлийг урвуулан ашиглах гэмт хэрэг байна.