NBA-гийн 69 дэх удаагийн бүх оддын тоглолт Чикаго хотын юнайтед центрт хоёрдугаар сарын 15-17-ний хооронд амжилттай зохион байгуулагдлаа. Сагсан бөмбөг сонирхогчдын хүсэн хүлээдэг бүх оддын цугларалт энэ жил олон олон шинэ формат нэмэгдсэн зохион байгуулалт өндөр болж өндөрлөлөө.

БАЯРЛАЛАА “SPS”

Спортын төрөлжсөн суваг “SPS” телевизийн хамт олон бүх оддын тоглолтыг талбай дээрээс шууд дамжуулан хүргэдэг болсноор ордон доторх уур амьсгалыг илүү мэдэрч мөн сагсчдадтай ярилцлага хийж оддыг хамгийн ойроос харж олон улсын сэтгүүлчтэй хамтдаа шууд дамжуулж байгаа нь сагсан бөмбөг сонирхогчдыг улам их баярлуулж, сагсан бөмбөгөөр хичээллэх хүүхэд багачуудад зөв үлгэр дуурайлал болж байгаад дахин дахин баяр хүргэж, амжилт хүсэе.

АМЕРИКИЙН ЭСРЭГ ДЭЛХИЙН БАГ

Бүх оддын тоглолтын эхний өдөр залуу тоглогчдын дундах тэмцээн Америкийн багийн эсрэг Дэлхийн баг гэсэн уламжлалт форматаар явагдлаа. NBA даяаршлагдаж дэлхийн топ спортын нэг болсон энэ цаг үед олон улсын тамирчид нэг баг болон тоглох нь олон улсад тус лигийн хүрээг улам бүр томсгож байгаа зүйл билээ. Энэ удаагийн тэмцээнд Америкийн баг 131-151 харьцаатай ялалт байгууллаа.

Залуу оддын тоглолтын үнэ цэнэтэй тоглогчоор (MVP) Шарлотт Хорнетс багийн довтлогч Майлс Брижс 20 оноо, 5 самбар, 5 дамжуулалт өгснөөр нэрлэгдлээ.

УР ЧАДВАР БА ХУРД ХҮЧ

Бүх оддын тоглолтын хоёр дахь өдөр ур чадварын тэмцээн, холын зайн шидэлтийн тэмцээн, цагираган дээрээс довтлох тэмцээнүүд болж өндөрлөлөө. Ур чадварын тэмцээнд “Өндрүүдийн эсрэг Жижигүүд”  гэсэн уламжлалт форматаар явагдсан бөгөөд энэ удаад нэгдүгээр шатнаас нэг ч жижиг тоглогч шалгараагүй нь онцлох содон зүйл байлаа. Хоёрдугаар шатанд шалгарсан дөрвөн тоглогчоос Миами Хит багийн төвийн тоглогч анх удаагаа бүх оддын тоглолтонд сонгогдсон Бэм Адебайо түрүүллээ.

Энэ өдрийн удаах тэмцээн холын зайн шидэлтийн тэмцээн энэ жилээс шинэ форматаар явагдаж гурван онооны хоёр бөмбөг нэмэгдэн нийт 40 оноо авах боломжтой болсон нь уг тэмцээнийг улам илүү өрсөлдөөнтэй болгов. Найман тамирчин өрсөлдсөнөөс Сакраменто Кингс багийн тоглогч Бадди Хилд 27 оноо аван түрүүллээ. Бадди Хилд нэгдүгээр шатнаас шалгарахдаа боломжит 40 онооноос 27 авсан юм.

Цагираган дээрээс довтлох тэмцээнд дөрвөн тамирчин өрсөлдөв. Финалын шатанд Орландо Мэжик багийн тоглогч Аарон Гордон болон Миами Хит багийн тоглогч Дэррик Жонс Жр шалгарч Дэррик Жонс Жр өөрийн 25 насны өдрөө түрүүлж Миами Хит баг энэ өдрийн тэмцээнээс аваргын хоёр цом өргөлөө.

ХҮНДЛЭЛ

Бүх оддын тоглолтын хоёр дахь өдөр NBA-гийн комиссар Адам Силвер мэдэгдэл гаргаж бүх оддын тоглолтын MVP буюу үнэ цэнэтэй тоглогчийн шагналыг Коби Брайнтын нэрэмжит болгохоо зарлав.

Мөн энэ өдрийн урлагын арга хэмжээнд Портланд трайл блеззерс багийн тоглогч Дамиан Лиллард өөрийн уран бүтээлийг толилуулсан бөгөөд “Mamba forever” гэсэн бомбер өмсөн хүндэтгэл үзүүллээ.

БАЯР БАХДАЛ, ГУНИГ ХАРУУСАЛ

Бүх оддын сүүлийн өдөр Лэброн Жэймс болон Яннис Адетокумбо багуудын хооронд оддын тоглолт өрнөлөө. Энэ жилээс шинэ форматаар явагдсан оддын тоглолт олон нийтийн зүгээс маш сайн гэсэн дүгнэлтийг авлаа. Гал гарсан ширүүн тоглолтын эцэст 157-155 онооны харьцаатай Лэброн Жэймсийн багийн ялалтаар өндөрлөв.

Коби Брайнтад хүндэтгэл үзүүлж Леброны баг Жижи Брайнтын 2 дугаар, Яннисын баг Коби Брайнтын 24 дугаарыг өмсөж бүх оддын тоглолтонд тоглов.Тоглолтын завсарлагаар урлагын арга хэмжээнүүд Коби Брайнтын гэгээн дурсгалд зориулсан байлаа. Бүх оддын тоглолтын (MVP) үнэ цэнэтэй тоглочоор Лос Анжелес Клипперс багийн тоглогч Кавай Леонард 30 оноо, 7 дамжуулалт өгснөөр шалгарч Коби Брайнтын нэрэмжит шагналын анхны эзэн боллоо. Тэрбээр “Би Кобид миний төлөө хийсэн бүх зүйлд баярлалаа гэж хэлэхийг хүсч байна. Надтай ярилцаж мөн хамт бэлтггэл хийсэнд баярлалаа. Энэхүү цомыг түүнд зориулж байна” гэв.

Сагсан бөмбөгийн тамирчид, үзэгч хөгжөөн дэмжигчдын хамгийн ихээр хүсэн хүлээдэг энэ удаагийн бүх оддын тоглолт баяр бахдал, гуниг харуусал ээлжилсээр өндөрлөлөө. Баярлалаа NBA, баярлалаа Чикаго, баярлалаа Коби Брайнт.

Б.Жаргал