Улаанбаатар хотын захирагчийн албанаас мэдээлэл хийлээ.

Улаанбаатар хотын менежер Т.Гантөмөр “Нийслэлийн засаг даргын захирамжийн хүрээнд нийслэлийн хэмжээнд халдваргүйжүүлэлтийн ажил хийж байна. Тухайлбал, шалган нэвтрүүлэх товчоо, галт тэргийн буудал, орон нутгийн товчоо, нийтийн тээврийн үйлчилгээ, үйлчилгээний болон эрсдэл бүхий цэг, хүнс болон махны цэг зэрэгт ариутгал хийж байна.

Эрсдэл бүхий түргэн үйлчилгээний цэг, хоёр дахь түүхий эд, орон сууцны хогийн сав, гэр хорооллын усан сан, нийтийн тээврийн автобусны буудал, нүхэн гарц зэрэг хүн ам олноор зорчдог газруудад Засаг даргын нөөц хөрөнгөөс гаргаж ариутгал хийж байна. Нийслэлийн хэмжээнд худалдааны 5651 газар байна. Үүнээс 1937 дэлгүүрийг, хоол үйлдвэрлэлийн 3488 аж ахуйн нэгжээс 509 газрыг халдваргүйжүүлсэн. Мөн ахуйн үйлчилгээний 2430 цэгээс 1492, 6572 цэгүүдээс өнөөдрийн байдлаар 2451 эрсдэл бүхий цэгт ариутгал хийгээд байна. Хүнсний томоохон дэлгүүрийг оролцуулахгүйгээр эрсдэл бүхий цэгийг тооцвол нийт 11600 цэг байна. Үүнээс 6398 цэгт ариутгал хийсэн байна. Цаашид мэргэжлийн байгууллагуудын ариутгалын бодис, чанартай үйлчилгээ, байнгын үр дүнтэй байх үүднээс холбогдох байгууллагууд хамтран ажиллаж, байнгын ажиллагааг хийж байна” гэв.

Нийслэлийн эрүүл мэндийн газрын хэлтсийн дарга Баатарсүх “Шинэ коронавирусын халдварын үед урьдчилан сэргийлэх ажил маш чухал байна. Бидний хувьд хлор агуулсан халдваргүйжүүлэлтийн уусмалыг өргөн хэрэглэж байна. Энэ нь вирусыг устгах өндөр чадвартай байдаг юм. Тиймээс иргэд гэрээ ариутгах, агаар сэлгэх зэрэг арга хэмжээг хийх, маскаа тогтмол зүүж хэвшээрэй” гэсэн юм.

А.Сүх