Шинэ төрлийн коронавирусын халдварын талаар мэргэжлийн байгууллагуудаас мэдээлэл хийлээ.
ЭМЯ-ны Олон нийттэй харилцах, тандалт шуурхай удирдлагын хэлтсийн дарга Д.Нарангэрэл “БНХАУ-ын 291 хүн халдвараар эдгэрч гарсан сайн мэдээтэй байна. Гэхдээ Сингапур, БНСУ, Япон улсад өвчлөл нэмэгдсэн байна. Ялангуяа БНСУ-д 24 цагийн дотор өвчлөл 56 тохиолдлоор нэмэгдлээ. Тухайлбал, өрвөн хот, зургуун мужид өвчлөл нэмэгдсэн байна. Хотын удирдлагуудаар аль болох эмнэлгийн байгууллагаар явахгүй байх, хоол хүнсээ болгож идэх, гараа тогтмол угаах, амьсгалын замын өвчтэй хүнээс зайлсхийх, амны хаалтаа тогтмол зүүх зэрэг зөвлөмж өгч байгаа юм байна. Манай улсын 48 иргэн тус улсад амьдарч байна. Тиймээс ЭМЯ-аас өгсөн зөвлөмжийг дагаж, эрүүл мэндээ хамгаалахыг анхааруулж байна. Өвчлөл гарсан улс орнуудад явахгүй байх зөвлөмж өгч байгаа. Өвчлөл гарсан 27 оронд орсон иргэд ямар нэгэн хэмжээгээр өөрийгөө тусгаарлах, шаардлагатай тохиолдолд эрүүл мэндийн байгууллагад хандах юм. Ирэх өдрүүдэд эрсдэл ихтэй нөхцөлд байх учраас аль болох айл хэсэхгүй байх, гэрийн нөхцөлд байхыг анхаарахыг хүсч байна” гэлээ.
ДЭМБ-ын мэргэжилтэн О.Ариунтуяа “Өнөөдрийн байдлаар халдварын 75777 тохиолдол бүртгэгдэж, 2129 нь нас барсан байна. БНХАУ-аас гадна 26 улсад 1098 тохиолдол, найман нас баралт бүртгэгдсэн. БНХАУ-д нас баралт багасч байгаа ч бусад улсуудад нэмэгдэж байна. 24 цагийн байдлаар БНСУ-д гарсан тохиолдол гурав дахин нэмэгдсэн” гэв.
Мөн эрүүл мэндийн байгууллагын эмч, ажилтнуудад ДЭМБ, Япон улсын Жайка байгууллага, НҮБ-ын Хүүхдийн сан, Польш улсад суугаа Монгол иргэд, Мөнхийн тун, Нахиа импекс, Монос групп, Их Уул зэрэг байгууллага, мөн УИХ-ын гишүүн О.Батнасан, иргэн Эрдэнэбат зэрэг хүмүүс эрүүл мэндийн байгууллагад хувийн хамгаалах хэрэгсэл хүргүүлжээ.
Б.Лхам
