"Капитал" банк дампуурсны буруутан, тус банкинд хадгалуулсан нийгмийн даатгалын сангийн чөлөөт үлдэгдэл болох 200 гаруй тэрбум төгрөгийг хэрхэн эргүүлэн авах бэ гэдэг асуудал өрнөж буй энэ цаг дор энэ мөнгийг хэн дур мэдэн найдваргүй банкинд хадгалуулсан бэ гэдэг асуултын хариултыг дээр дооргүй хайсаар байна. Асуултын хариулт Хөдөлмөр, нийгмийн хамгааллын сайд С.Чинзориг дээр ирээд гацаж, “Тэр буруутай. Тиймээс яллагдагчаар татлаа” гэх шуум тараад амжсан. Гэвч эрхэм сайд үүнийг үгүйсгээд өөрийн нэр төрөө цэвэрлэх үүднээс АТГ, прокурорын байгууллагад хандана гэдгээ мэдэгдсэн юм.

Нийгмийн даатгалын сангийн чөлөөт үлдэгдэл болох 200 гаруй тэрбум төгрөг салхинд хийсэхтэй зэрэгцэн ирээдүйд тэтгэвэр авагчдын халаас хоосрох эрсдэл үүссэн гэхэд болно. Нийгэмд ийм эмзэг асуудал үүссэн учраас хэн хүнгүй бухимдаж, уцаарлан үүнийгээ ч цахим орчинд илэрхийлэх болоод удав.

Гэвч энэ дундаас нэг хүн чих нь дүлий мэт авирлаж буй нэг хүн бол УИХ-ын гишүүн Б.Ундармаа. Цагтаа Монголын тэргүүн баячуудын тоонд багтаж явсан тэрбээр хөрөнгийн 200 орчим сая ам.доллараар хэмжигддэг.

Нөхөртөө тэрбум төгрөгийн автомашин бэлэглэжээ гэх ярианы эзэн болоод зогсохгүй дампуурсан “Капитал” банкнаас хувь эзээмшдэг байв. Үүнийг ч АТГ-д мэдүүлсэн. Гэвч “Би “Капитал”-аас хувь эзэмшдэггүй” гэж нэг бус удаа гүрийж мэдэгдээд олны элэг доог болонгоо алдсан. Сав л хийвэл инээдтэй ч гэмээр юм уу, элгийн гэмээр зүйл чуулганы танхимд хэлж, унтаа, согтуугаараа дуудуулдаг байсан тэрбээр банк дампуурснаас хойш ичээндээ бүгсэн гэхэд болно. Аль болох олны нүднээс хол байж, чуулганы танхимд ч үг хэлэх нь ховордсон. Нийгмийн даатгалын сангийн хөрөнгийг “Капитал” банкинд хадгалуулсан буруутанг хайж байх энэ цаг үед ч тэрбээр мөн л чимээгүй суусаар. Магад чимээгүй байх нь түүнд ашигтай байж ч мэдэх.

Гэвч олон зуун тэрбумаар хэмжигдэх хөрөнгөтэй банк нь дампуурсан байхад тэрбээр яагаад буруутанг хайхгүй байна вэ.

Буруутанг нууцаар хайж байна уу, эсвэл банк дампуурна гэдгийг эртнээс мэдэж байсан юм болов уу.

Аль нь ч бай, банк дампуурсан. Түүний хөрөнгийг хуу хамаад ч болов төрийг, ард түмнийг хохиролгүй болгох ёстой боловч тэгсэнгүй.

Ард түмний мөнгийг дампуурсан "Капитал"-д хадгалуулсан буруутнаар  цоллогдсон С.Чинзориг сайдын мэдэгдсэнээр төрийн мөнгийг буцааж авахаар Монголбанкны зүгээс "Капитал"-д хандсан боловч ямар нэг ямар нэг хариу өгөөгүй аж. Дээрхээс гадна "Капитал" банк тус банкны гол хувьцаа эзэмшигч УИХ-ын гишүүн Б.Ундармаа төрийг, ард түмнийг хохиролгүй болгох чин хүсэл эрмэлзэл түүнд байна уу гэдэг эргэлзээтэй байна.

Учир нь салбарын сайдын мэдэгдсэнээр ""Капитал" банк нийгмийн даатгалын хөрөнгийг төсвийн хөрөнгөтэй адилтгаж, өр барагдуулах дарааллын хойгуур оруулсан нь тогтоогдсон. Тиймээс нийслэлийн захиргааны хэргийн шүүхэд хандсан. Шүүх хурал товлогдсон ч Монголбанкнаас тайлбар, лавлагаа авах шаардлагатай гэдэг үндэслэлээр шүүх хурал хойшлогдсон” гэсэн юм.

Эндээс л эрхэм гишүүн Б.Ундармаагийн чимээгүй суугаагийн шалтгаан нь дараагийн нүүдлээ төлөвлөж байхыг үгүйсгэхгүы байхын аргагүй.

Гагцхүү түүний дараагийн нүүдэл юу бол гэдэг нь хамгийн сонирхолтой хэсэг. Тэрбээр өмнө нь "Капитал"-аас хувь эзэмшдэггүй гэж хэргээс бултах гэж үзсэн бол дараа нь банк дампуурахад улс төрийн нөлөө орсон. Бараг л албаар шахуу дампууруулж, хөрөнгийг минь хураах гэлээ гэх маягийн мэдэгдэл хийж байв. Тэгвэл гурав дахь удаагаа ямар мэдэгдэл, ямар гаргалгаа гаргаж ирэх бол. Магад банкинд төрийн мөнгийг дур мэдэн хадгалуулсан хэргийн буруутан илрэхтэй зэрэгцэн банк дампуурсан шалтаг ч тодорхой болохыг үгүйсгэхгүй. Тэр болтол эрхэм гишүүн амаа үдүүлсэн мэт чимээгүй суух нь дамжиггүй биз ээ.

Г.Маргад

Жич: УИХ-ын гишүүн Б.Ундармаагийн АТГ-т мэдүүлсэн хөрөнгө орлогын мэдүүлгийг дор хавсаргав.