“Токио-2020” олимпийн наадамд оролцох эрх олгох боксын Ази, номхон далайн орнуудын тэмцээн болж байгаа бөгөөд манайхаас шигшээ багийн ахлах дасгалжуулагч Д.Батсүрэнгийн удирдлага дор нийт 13 (эрэгтэй найм, эмэгтэй тав) тамирчин өрсөлдөж байна.

Тэмцээн эхлээд гурав хоноход манай тамирчдаас эрэгтэйчүүдийн 52 кг-д Х.Энхмандах, 69 кг-ын жинд Б.Мишээлт, 75 кг-д О.Бямба-Эрдэнэ, 63 кг-д Б.Чинзориг нар ялсан бол эмэгтэйчүүдээс 57 кг-д Азийн аварга Т.Болортуул эхний ялалтаа авсан байна. Тэгвэл өнөөдөр Б.Мишээлт хоёр дахь тулаанаа хийх бол -91 кг-д С.Эрдэнэбаяр, эмэгтэйчүүдийн 69 кг-д У.Шинэцэцэг, 75 кг-д М.Мягмаржаргал нарын хувьд эхний тулаанаа хийх юм. Тус тэмцээнээр хөнгөн жинд эхний зургаа, дунд жинд эхний тав, хүнд жинд эхний дөрвөн байрт орсон боксчинд олимпийн эрх олгоно.

Монголын ширэн бээлийтнүүд 1972 оны олимпийн наадмаас хойш тасралтгүй 11 олимпийн наадамд өрсөлдөж, нэг алт, гурван мөнгө, гурван хүрэл медаль хүртээд байгаа билээ.

Б.Жаргал