УИХ-ын 30 гаруй гишүүдэд ЖДҮХС-гийн нийт 8.6 тэрбум төгрөгийг халааслах боломжийг олгосон гэх хэрэгт унаад буй сайд асан Б.Батзориг нарт холбогдох хэргийн шүүх хурал Баянзүрх дүүргийн Эрүүгийн хэргийн анхан шатны шүүхэд эхэллээ.
Хэргийг нэхэн сануулбал, ЖДҮХС-гаас улс төрд нөлөө бүхий болон тэдгээрийн хамаарал бүхий этгээдүүдэд эрх мэдэл, албан тушаалын байдлаа урвуулан ашиглаж 8.6 тэрбум төгрөгийн зээл олгосон гэх хэрэгт Б.Батзориг нарын зургаан иргэнийг нийслэлийн Прокурорын газар яллах дүгнэлт үйлдсэн юм. Хэргийн мөрдөн шалгах явцад тэрбээр хэргээ сайн дураараа хүлээн зөвшөөрч хэргээ хялбаршуулсан журмаар шийдвэрлүүлэх хүсэлтийг прокурорт гаргасан бөгөөд прокурор ч уг хүсэлтийг хүлээж авсан юм.
Өөрөөр хэлбэл, тэрбээр нэг жил хоригдож, нийтийн албанд томилогдох эрхээ таван жилээр хасуулж, учруулсан хохирлоо төлөхгүй байх тохиролцоог прокурортой хийсэн юм. Прокурор хуулийн хүрээнд уг хүсэлтийг хүлээн авч Баянзүрх дүүргийн Эрүүгийн хэргийн анхан шатны шүүхэд хүргүүлсэн ч шүүгч Д.Мөнхтуяа саналыг хянаж үзээд “Хэргийг ердийн журмаар шийдвэрлэх нь зүйтэй” гэж үзэн шүүх хурлыг ийн товлосон юм.
Г.Маргад