Хан-Уул дүүргийн Эрүүгийн хэргийн анхан шатны шүүхэд өнөөдөр 09:00 цагаас Салхитын мөнгөний ордтой холбоотой хэргийг шийдэхдээ хахууль авсан байж болзошгүй шүүгч нарыг, хахууль өгсөн үйлдэлд Б.Мөнгөншагай, Г.Жаргалан, зуучилсан үйлдэлд Хан-Уул дүүргийн Цагдаагийн I хэлтсийн Мөрдөн байцаах тасгийн даргаар ажиллаж байсан хошууч Г.Алтан-Очир зэрэг хүнийг гэм буруутай эсэхийг шийдэх шүүх хурал боллоо. Тодруулбал, 
1. Улсын дээд шүүхийн шүүгч Г.Цагаанцоож
2. Улсын дээд шүүхийн шүүгч Д.Цолмон
3. Захиргааны хэргийн давж заалдах шатны шүүхийн шүүгч Э.Халиунбаяр
4. Сонгинохайрхан дүүргийн Иргэний хэргийн анхан шатны шүүхийн  Ерөнхий шүүгч  Б.Цолмонбаатар
5. Чингэлтэй дүүргийн Иргэний хэргийн анхан шатны шүүхийн шүүгч, Ерөнхий шүүгч Б.Сайханцэцэг
6. Улсын дээд шүүхийн шүүгч Ц.Амарсайхан нарыг хахуулийн хэргээр шалгаж, хэргийг яллах дүгнэлттэйгээр шүүхэд шилжүүлээд байгаа юм.
Улсын дээд шүүхийн шүүгч Ц.Амарсайхан хилийн чандад эмчилгээ хийлгэж байгаа тул хэргийг нь дээрх хэргээс хэргийг нь тусгаарлаад байгаа юм. Ингэснээр өнөөдөр таван шүүгчийг гэм буруутай эсэхийг шүүхээр хэлэлцсэн ч шүүгдэгч Д.Цолмонгийн өмгөөлөгч Ц.Одончимэг Давж заалдах шатны эрүүгийн шүүхэд хурал давхацсан, шүүгдэгч Ч.Амгаланбаяр өмгөөлөгч авах хүсэлт гаргасныг хүлээн авч мөн прокурор, өмгөөлөгчдийн гаргасан санал, хүсэлтийг харгалзан шүүх хуралдааныг  ирэх сарын 13-ны 09.30 цаг хүртэл хойшлууллаа.

Ташрамд дурдахад, нийслэлийн Прокурорын газрас дээрх иргэдэд Эрүүгийн хуулийн 22.4, 22.5-д зааснаар яллах дүгнэлт үйлдсэн бөгөөд шүүх хурал нээлттэй болох юм.