Шинэ төрлийн коронавирусний улмаас парламент ажин түжин байна. Засгийн газар, Улсын онцгой комисс шуурхай хуралдаж, цаг үеийн асуудлаар шийдвэр гаргаж байгааг эс тооцвол гишүүд бусдынхаа адил бүгсэн бололтой.
Гэхдээ цаг үеийн нөхцөл шаардлагаас улс төр бүхэлдээ унтаа байдалд шилжсэн үү гэвэл үгүй. Хөшигний ар дахь тохироо, өөр хоорондоо гар барьсан үйл явдал урьдынх шигээ өрнөж байна.
Тэдгээрээс сонирхол татахуйц нэгэн үйл явдал удахгүй өрнөх нь АН, О.Баасанхүү гишүүнтэй холбогдох нь. Тодруулбал, ирэх дөрөвдүгээр сард нээлтээ хийх хаврын чуулганы эхэнд УИХ дахь АН-ын зөвлөл нэг гишүүнээр бүл нэмэх нь. Тэр нь О.Баасанхүү.
Угтаа бол О.Баасанхүү гишүүн МАХН-ынх. Тус намаас УИХ-ын сонгуульд нэр дэвшиж гишүүн болсон. Н.Энхбаяртай намын даргын тамга, тэмдгээ булаацалдаж, хэсэгтээ л толхилцсон. Гэвч Улсын дээд шүүхээс гишүүн О.Баасанхүүг МАХН-ын даргаар бүртгэхээс татгалзсанаар түүний сонирхолд цэг тавьсан юм. Тэглээ гээд түүний улс төр зогссонгүй.
УИХ-д МАХН-ын төлөөлөл гэхээсээ бие даагч гишүүн шиг л ажилласан. Бараг сөрөг хүчин АН-аасаа илүү ажиллаж, МАН, Засгийн газрын үйл ажиллагаанд шүүмжлэлтэй хандаж ирсэн байдаг.
Гагцхүү улс төрд мөнхийн найз, дайсан байхгүй харин мөнхийн эрх ашиг байдаг гэгчээр тэрбээр сонгуулийн ийнхүү өмнө буурь сэлгэж, албан ёсоор МАХН-аас өрх тусгаарлаж, АН-ын гишүүн болох нь.
Цаашлаад тус намаас УИХ-ын сонгуульд нэр дэвших нь. Түүний хувьд өнгөрсөн оны зургадугаар сард АН-ын зөвлөлд орох хүсэлтээ хүргүүлж байсан удаатай. Ингэхдээ МАХН-аас гаралгүйгээр, намаа төлөөлж АН-ыг УИХ-д Бүлэгтэй, хүчтэй сөрөг хүчин болгоход нэгдэж байгаа тухайгаа илэрхийлж байв.
Г.Эрхэс
Сэтгэгдэл (7)