МАН-ын Бага хурал өнөөдөр Тусгаар тогтнолын ордонд болно. Ингэхдээ онлайнаар хуралдах шийдвэрийг тус намын Удирдах зөвлөлөөс гаргаад байгаа юм. Хуралдаанаар 2020 оны сонгуулийн мөрийн хөтөлбөрөө хэлэлцэж, батлахаас гадна цаг үеийн асуудлыг хэлэлцэхээр товложээ. Үүнээс гадна онцгой дэглэмийн үед хариуцлага алдсан Нарийн бичгийн дарга Ц.Бат-Энхийг чөлөөлж, орных нь хүнийг томилох асуудлыг хэлэлцэх бололтой.

11.00 цагаас хаалттай хуралдах Бага хурлыг УИХ-ын дарга Г.Занданшатар, УИХ дахь МАН-ын Бүлгийн дэд дарга Б.Саранчимэг нар удирдан явуулах шийдвэрийг Удирдах зөвлөлөөс гаргасан байна. Ингэхдээ Бага хурлын 369 төлөөлөгчийг нэг өрөөнд 7 хүн байрлуулах журмаар онлайнаар хуралдахаар болсон аж.

Сонгуулийн тухай хуулиар намууд гуравдугаар сарын 25-ны дотор Үндэсний аудитын газар мөрийн хөтөлбөрөө хүргүүлэх заалттай. Энэ хүрээнд АН-ынхан мөрийн хөтөлбөрөө батлах Үндэсний бодлогын хорооны хурлаа онлайнаар хийсэн байдаг.

С.Сүлд