Сонгуулийн поп амлалтууд эхэллээ. Намууд эхнээсээ хөзрөө дэлгэцгээж байна. МАН-ын зүгээс ирэх дөрвөн жилд иргэдээ орон сууцжуулна гэж амласан бол АН-ын хувьд хэд хоногийн өмнө мөрийн хөтөлбөрөө баталсан. Ингэхдээ 2031 он гэхэд нийгэм, эдийн засгийн гол үзүүлэлтүүдийг өсгөх чиглэлээр зорилтоо эрэмбэлжээ. Эндээс үзвэл, ирэх сонгуульд ямар амлалт амлахыг намын дарга С.Эрдэнэ болон дэд дарга З.Нарантуяа нар тун удахгүй дэлгэх бололтой.

Түүнчлэн улст өрийн 11 нам, төрийн бус 109 байгууллага нар нэгдэн Шинэ эвсэл байгуулж байгаагаа өчигдөр мэдэгдсэн. Ж.Батзандан болон түүний эвслийнхний зүгээс ирэх дөрвөн жилд “Өргүй Монгол” хөтөлбөр хэрэгжүүлнэ гэнэ.

Тодруулбал, манай улс 30 орчим тэрбум ам.долларын гадаад өртэй. Уг өрүүд ирэх оноос эхлэх бөгөөд дэлхий нийтэд халдварт өвчин гарсантай холбогдуулан хэрхэн төлөх вэ гэдэг асуудал тулгараад буй. Тэгвэл “Шинэ эвсэл”-ийнхний зүгээс уг өрийг Монголын толгой баян буюу бүр дээрээс чиглүүлж байдаг ч гэж ярьдаг “30 гэр бүл”-ээр төлүүлэх хөтөлбөр хэрэгжүүлэхээр болсноо зарласан юм.

Ж.Батзандан ба түүний нөхдийн дараагийн нүүдэл эвсэл байгуулж, ирэх сонгуульд өрсөлдөх. Намаасаа хөөгдсөн түүний хувьд шинэ нүүдлээ ийн тооцоолох нь ч аргагүй.

Гэхдээ хоёр дахь удаагаа сонгогдон ажиллаж байгаа түүний хувьд амлалтаа биелүүлэхийн төлөө зүтгэнэ гэдэг юу л бол. Саяхан Ж.Батзандан, Л.Болд нарын таван гишүүн МАНАН бүлгэм ярьсаар УИХ-ын даргыг суудлаас нь унагаж байсан. Зарим нь эрх мэдэлд хүрснээр МАНАН-ийн эсрэг тэмцэлд цэг тавьсан гэхэд болно. 

Эндээс Монголын ард түмэнд өгөөжтэй байв уу гэвэл үгүй гэдэг нь тодорхой.

Түүний дараагийн попрол нь С.Зоригийн амь насыг бүрэлгэсэн хэргийг тойрсон асуудал байв. Зарим учир мэдэх хүмүүсийн зүгээс Т.Чимгээ, Б.Содномдаржаа нар хэрэг үйлдэхэд хамтран оролцсон тул суллаад гаргах ямар ч боломжгүй гэдгийг хэлж байгаа. Гэвч хорих ангид ял эдэлж байгаа Т.Чимгээ, Б.Содномдаржаа нарыг суллах ёстой гэж иргэний хөдөлгөөнийхнийг урдаа барьж лоозондож байсан эрхэм гишүүн Ж.Батзандан коронавирусний тархалттай зэрэгцээд гэртээ бүгсэн.

Магад дэлхий дахинд ийн давагдашгүй хүчин зүйл тохиогүй байсан бол тэрбээр өдийд гудамжинд жагссан хэвээр байх байсан гэдэг нь тодорхой. Гэвч түүний санаархал биелэлээ олоогүй тул тэрбээр "30 гэр бүл" гэх поп сэдэв рүү буурь сэлгэлээ. Хамгийн гол нь, Ж.Батзандан тэргүүтэй хүмүүс эдгээр гэр бүлтэй нягт холбоо сүлбээтэй гэх шуум бий. Цаг үед тэр болон тэдний нөхдийн тэмцэл амжилт олох нь юу л бол. Ёстой л Жагсагчид нь шоронд, уриалагчид нь ордонд гэдэг шиг болох вий дээ.

Б.Лхам