Шинэ төрлийн коронавирусний тархалтын улмаас хорио цээрийн арга хэмжээг дөрөвдүгээр сарын 30-ныг хүртэл сунгасантай холбогдуулан УИХ-ын хаврын ээлжит чуулганыг ирэх сарын 6-нд цахимаар явуулахаар боллоо. 
Энэ үеэр яригдах гол асуудал нь үүссэн нөхцөл байдалтай холбогдуулан төсөвт тодотгол хийх эсэх тухай хүлээлт байна. Учир нь дан ганц манай улс ч гэлтгүй дэлхий нийтэд эдийн засгийн хүндрэл тулгараад байгаа юм. Зарим хөгжингүй оронд бонд гаргаж, тахлын улмаас бий болсон хүндрэлийг шийдэхэд зарцуулж байна. Мэргэжлийн экспертүүдийн дүгнэж байгаагаар эдийн засаг сэргэхэд дор хаяж 18 сарын хугацаа шаардлагатайг тэмдэглэж буй. Тиймээс чуулганы гол сэдэв төсөвт тодотгол хийх эсэх асуудал гэж харах шалтгаан байгаа юм. 
Төсөвт тодотгол хийх шаардлагатай талаар улс төр, эдийн засагчид хэрхэн байр сууриа илэрхийлснийг хүргэе. 
Ерөнхий сайд асан М.Энхсайхан "Халдварын үед бизнес, эдийн засгийн шинэ харилцаа үүсэх байх. Гэхдээ эдийн засаг хурдан сэргэж чадахгүй. Халдварын аюул эрэлт, нийлүүлэлтэд хүнд цохилт үзүүлж байна. Дэлхий нийт хэмнэлтийн горимд шилжиж байгаа энэ үед иргэдээ хэрхэн зөв чиглүүлж, хамгаалах чухал асуудал болоод байна. Коронавирусний эдийн засагт үзүүлэх нөлөө нь 18 сар буюу түүнээс дээш гэж дэлхийн экспертүүд хэлж байгаа. Тиймээс Их Хурал төсвийн бодлогоо тодотгох хэрэгтэй. Ингэж байж дараагийн мөнгөний бодлого гарч ирнэ. Алдагдал төлөвлөж чадсан юм чинь түүнийг санхүүжүүлэх мөнгө хаа нэгтээ төлөвлөсөн байж л таараа. Үүнийгээ иргэд рүүгээ зарцуул. Цемент шохой битгий болго. Мөнгөтэй орнууд цар тахлын бонд гаргана гэж яриад сууж байхад манайх яагаад болохгүй гэж. Бид ч ийм байдлаар иргэдээ хамгаалж болно" хэмээн “Ам нээвэл” нэвтрүүлгийн үеэр дурдсан юм.
АН-ын зүгээс төсөвт тодотгол хийх шаардлага үүссэн талаар мэдэгдсээр байгаа. Тэдний зүгээс “ҮАБЗ-ийн шийдвэр ч үүнийг хэрэгжүүлэх эхний алхам болж буй гэж харж байгаа. Үүнийгээ хуулийн төсөл болгон УИХ-д өргөн барих ёстой. Улмаар 2020 оны төсөвт тодотгол хийх зайлшгүй шаардлага үүсэж байна. Газрын хэвлийн баялгийг иргэдэд хүртээхдээ Үндсэн хуулийн суурь зарчмыг баримтлах ёстой. Өөрөөр хэлбэл, эл асуудлыг цаашид илүү өргөн хүрээнд харж, зөвхөн тэтгэврийн зээл бус, нийт иргэнийхээ өрийг стратегийн ордуудын үр өгөөжөөс барагдуулахад чиглэх учиртай” гэдгийг онцолж буй.
ШИНЭ намын дарга Ж.Батзандан “Короновирусний тархалтаас үүдэлтэйгээр Монгол Улсын эдийн засагт тулгамдаж буй хүндрэлийг даван туулах асуудлыг хэлэлцлээ. Карантины улмаас аж ахуйн нэгжүүдийн бизнесийн үйл ажиллагаа саарч, улмаар улсын төсвийн орлого тасалдаж байгаа тухай мэдээлэл ирж байна.
Харин УИХ-ын гишүүн О.Баасанхүү төсөвт тодотгол хийж, ойрын хугацаанд хийх шаардлагагүй зүйлээ танах шаардлагатай гэсэн байр суурийг илэрхийлж байгаа юм. Өөрөөр хэлбэл, сөрөг хүчнийхний зүгээс төсөвт тодотгол хийх шаардлагатай гэсэн байр суурийг илэрхийлж байгаа юм.

Б.Лхам