ОХУ-ын Ерөнхийлөгч В.Путин ОХУ-Монгол-Хятадыг холбох “Сибирийн хүч-2” хийн хоолойн төслийг эхлүүлэхийг үүрэг болгожээ. Ингэхдээ "Сибирийн хүч-2" хийн хоолойн зураг төсөл, судалгааны ажил болон ТЭЗҮ-ийг боловсруулж эхлэхийг зөвшөөрсөн байна. Энэ тухай "Газпром"-ын тэргүүн Алексей Миллертэй уулзах үеэрээ мэдэгджээ. Энэ үеэр "Сибирийн хүч-2" ТЭЗҮ-ийг урьдчилсан байдлаар эдийн засгийн хувьд ашигтай, зардал багатай гэсэн эерэг дүн гарсан талаар Алексей Миллер уламжилсан байна. Энэхүү хийн хоолойн нь БНХАУ-ын баруун хэсгийн зах зээлийг хангах аж.

Алексей Миллер хэлэхдээ "Газпром" компани нь Зүүн Сибирьт байгаа хийн тээврийн хүчин чадлыг Оросын Европын хэсэг дэх хийн хоолойтой хослуулах асуудалтай тулгарч байгаа гэжээ. Мөн "Хоёр чиглэлд байгалийн хийн нийлүүлэлтийг хангаж, Оросын бүс нутагт хийн хангамжийн найдвартай байдлыг улам бүр нэмэгдүүлнэ" гэсэн байна.

“Газпром” компани Монголын нутгаар дамжуулан БНХАУ руу тавих "Сибирийн хүч-2" хийн хоолой жилдээ 50 тэрбум куб метр байгалийн хий нийлүүлэх боломжтой аж. Өмнө нь 30 тэрбум куб метр байгалийн хий нийлүүлэх боломжтой гэсэн дүгнэлт гарч байсан байдаг.

Онцлоход Ерөнхий сайд У.Хүрэлсүхийн ОХУ-д хийсэн айлчлалын гол хэлэлцээр хийн хоолойг Монголоор дамжуулах тухай байсан юм. "Сибирийн хүч-2” төслийн хүрээнд жилд 50 тэрбум куб метр хийг Монголын газар нутгаар дамжуулан Хятадын баруун бүсийн зах зээлд нийлүүлэх боломжтой. ОХУ 2019 оны арванхоёрдугаар сараас эхлэн жилд 38 тэрбум куб метр хийх дамжуулах хүчин чадалтай “Сибирийн хүч” хийн хоолойгоор дамжуулан Хятад улсад хий нийлүүлж байгаа юм.

С.Сүлд