Энэ сарын 2-ны өдөр тусгай үүргийн онгоц Улаанбаатар-Сөүл-Улаанбаатар чиглэлд нисэж, БНСУ дахь иргэдээ авчрахаар болсон. Уг нислэгээр тус улсад суралцдаг 300 гаруй Монгол оюутан буцах хүсэлтээ гаргаад байгааг Гадаад харилцааны яамнаас мэдээлсэн юм.

Дэлхий дахинд коронавирусний цар тахал эрчимжиж байгаатай холбогдуулан улс орнууд хилийн хяналтаа чангаруулж, зарим улсууд гадаад иргэдийг нэвтрүүлэхгүй байх арга хэмжээ аваад эхэлсэн. Тэгвэл БНСУ-ын Гамшигын аюулаас сэргийлэх төвөөс ирэх сарын 1-ний өдрийн 00.00 цагаас эхлэн дэлхийн бүх улс орноос хил нэвтрэн орж ирж байгаа зорчигчдыг 14 хоног тусгаарлах шийдвэр гаргасан талар тус улсын ЭМЯ-ны сайд Пак Нын Хү мэдээлсэн байна. Энхүү арга хэмжээ нь тус улсад өөрийн гэсэн оршин суух орон байргүй тохиолдолд Засгийн газар болон орон нутгийн өөрөө удирдах байгууллагаас хангасан тусгаарлах байранд байрлаж тусгаарлагдах юм.

Энэ тохиолдолд тусгаарлах байрны зардлыг өөрсдөө төлөх ёстой бөгөөд дунджаар нэг өдрийн 100 мянган воны үнэтэй, 14 хоновол ойролцоогоор 1.4 сая вон орчим болох аж.

Энэ нь ирэх сарын 1-нээс хойш хилээр орж ирсэн бүх хүнд хамаарах бөгөөд үүнээс өмнө орж ирэн тусгаарлах байранд байгаа хүмүүст хамаарагдахгүй гэжээ. 

Энэ тухай "Богино хугацаагаар орж ирсэн гадаадын иргэд хоёр долоо хоног өөрийгөө тусгаарлахыг бодолцож орж ирэх шаардлагатай. Ийм арга хэмжээ авах болсон шалтгаан нь манай улсад халдвар гаднаас зөөвөрлөгдөн орж ирж байгаатай шууд холбоотой" гэж хэлсэн байна. Мөн "Олон нийтийн болон улсын эрх ашгийг хөндөх талыг бодолцон үзэн маш чухал эдийн засгийн арга хэмжээ, эрүүл мэнд, эрдэм шинжилгээний болон хүмүүнлэгийн ажлаар ирсэн  тохиолдолд тусгайлан харж үзнэ" гэсэн байна.

Тусгайлан харж үзэхэд A1 (дипломат харилцаа), A2 (албаны ажил), A3 (гэрээ хэлэлцээр) байх тохиолдол орох ажээ.

Энэ тохиолдолд ирэхээсээ өмнө БНСУ-ын тус улсад орших Элчин сайдын яамнаас дээр дурьдсан тусгайлан харж үзэх зорилго бүхий айлчлалыг хүлээн зөвшөөрөх "Өөрийгөө тусгаарлахаас чөлөөлөх" бичгийг авсан байх ёстой. Ингэж чөлөөлөгдөж түр хугацаагаар ирсэн гадаад иргэний хувьд тусгаарлалтанд орохгүй ч, онгоцны буудал дээр коронагийн шинжилгээнд хамрагдан хариу "сөрөг" гарсны дараа хяналтанд орох юм байна. Энэ хяналт нь эрүүл мэндийн аппликэйшнийг утсандаа суулган, өдөр бүр утсаар холбогдон шалгах арга юм.

Хэрэв хилээр орж ирж байгаа үедээ коронагийн шинж тэмдэг илэрвэл (гадаад, дотоод ялгаагүй) шууд шинжилгээнд оруулах бөгөөд шинжилгээний хариу сөрөг гарсаны дараа 14 хоног өөрийгөө тусгаарлах болно. Өмнө нь орж ирээд 14 хоног болоогүй хүмүүс орж ирсэн өдрөөсөө хойш тооцож, 14 хоног өөрийгөө тусгаарлахыг мэссэжээр мэдэгдэх бөгөөд шинж тэмдэг илэрч байгаа хүмүүсийг шинжилгээнд орохыг зааварчлах аж.

Ойрын өдрүүдэд Инчон нисэх буудлаар өдөрт дунджаар 7000 гаруй зорчигч үйлчлүүлж байгаагаас 2000 гаруй нь гадаадын иргэд юм байна. Ташрамд дурьдахад, Солонгос улсад тусгаарлалтанд байх хугацаандаа нууцаар гадагшаа гарах, олон нийтийн газраар явах, тусгаарлалтыг зөрчсөн тохиолдолд нэг жил хүртлэх хорих ял эсвэл 10 сая хүртлэх воны торгууль ноогдуулдаг хуультай юм байна.

Дээрх мэдэгдлээс үзвэл, БНСУ руу буцах хүсэлт гаргасан 300 гаруй оюутнууд эхний ээлжинд 14 хоног тусгаарлагдах байрны төлбөр болох 1.4 сая воныг өөрсдөөсөө гарах юм байна. Хэрвээ уг төлбөрийг цагт нь төлөөгүй бол улсын хилээр нэвтрүүлэхгүй бөгөөд шаардлагатай тохиолдолд нутаг буцаана гэдгийг мөн мэдэгджээ

Г.Маргад