Эрүүл мэндийн яамнаас цаг үеийн асуудлаар мэдээлэл хийлээ.
Энэ сарын 29-нд мэдээлэл хийснээс хойш халдвар дэлхийн 202 улсад тархсан байна. ОХУ-ын Эрхүү хотод анхны тохиолдол илэрсэн. Мөн АНУ-д нөхцөл байдал хүндэрч байгаатай холбогдуулан тус улсын Ерөнхийлөгчийн зүгээс зай барих стратегийг дөрөвдүгээр сарын 30-ны өдөр хүртэл үргэлжлүүлэх шийдвэр гаргажээ.
ЭМЯ-ны Гадаад харилцааны хэлтсийн дарга Б.Янжмаа “АНУ-д нийт тохиолдол 140 мянгад хүрч, нас баралт 2400 давсан байна. Гэхдээ тус улсад халдварын оргил үе болоогүй байгааг мэргэжлийн байгууллагуудаас онцолжээ. Мөн Итали улсад 756 нас баралт бүртгэгдсэн байна. Хязгаарлалтын арга хэмжээгээ ирэх зургадугаар сар хүртэл сунгах талаар мэдэгдлээ.
Германд нэг өдрийн дотор 4000 гаруй халдвар нэмэгдсэн бол Токио хотод эх уурхай нь тодорхойгүй халдвар илрэх болжээ. БНСУ-д халдварыг эрт илрүүлэх ажлыг эрчимжүүлж байна. Улмаар гаднаас ирэх зорчигчдыг 14 хоног тусгаарлахаар болсон байна. Манай улсын иргэд тусгай үүргийн нислэгээр БНСУ явах хүсэлт гаргаад байгаа. Очоод 14 хоног тусгаарлагдах бөгөөд зардлаа өөрсдөөсөө гаргах тул ажил төрлөө зохицуулаарай” гэлээ.
ЭМЯ-ны Эмнэлгийн тусламж, үйлчилгээний хэлтсийн дарга Я.Буянжаргал “Нийт 3886 хүн байгаагаас одоогоор ажиглалтад 2468 хүн байна. Үүнээс жирэмсэн 43, 0-5 хүртлэх насны 56 хүүхэд байна. Тусгаарлах байранд 337 эмч ажилтан ажиллаж байгаа юм. Галт тэргэнд 24 цагийн дотор 3301 иргэнд ажиглалт тандалт хийсэн. Мөн 109 утсаар тоглож залгах явдал их байна. Тиймээс энэ утас руу залгах шаардлагатай олон хүн байгаа учраас бусаддаа битгий саад болоорой. Иргэнийхээ үүргийг биелүүлэх хэрэгтэй"-г санууллаа.
А.Сүх
