Нийслэлийн онцгой комиссоос гаргасан шийдвэрийг Улаанбаатар хотын захирагч бөгөөд Нийслэлийн Засаг дарга С.Амарсайхан танилцуулж байна. Тэрбээр "Дэлхийн улс орнуудад Covid-19 эрчимтэй тархаж байгаа тул өмнө нь гаргасан хөл хорионы шийдвэрээ дөрөвдүгээр сарын 30 хүртэл үргэлжлүүлэхээр болсон. Ингэхдээ олон нийт цуглаж болох газар, фитнес, спорт зал, сургалтын төв, саун, амралт, баар, цэнгээний газар, сүм хийд, соёл урлагийн газрын үйл ажиллагаанд тавьсан хөл хориог дөрөвдүгээр сарын 30-ныг хүртэл сунгалаа. Цаг агаар дулаарч байгаа тул коронавирусний халдвар тархах магадлал өндөр байгаа тул хөл хориог ийнхүү сунгаж байгаа юм.
Ариутгал халдваргүйжүүлэлтийн ажлыг стандартад нийцсэн бодисоор хийж байна. Энэ долоо хоногт хоёр дахь шатны ариутгал халдваргүйжүүлэлтийг хийнэ. Улаанбаатар хотод байгаа бүхий л техник тоног төхөөрөмжийг ашиглаж байна. Иргэд аж ахуй нэгжүүд ойр орчмын газартаа өөрсдөө ариутгал халдваргүйжүүлэлтээ хийх хэрэгтэй байна. Бүх зүйлийг хотоос хийх боломжгүй. Өмнө нь энэ мэтчилэн ариутгал халдваргүйжүүлэлтийг ажлыг Улаанбаатар хотод хийж байгаагүй. Иймээс цаашид жил бүр тэр тусмаа хаврын цагт ариутгал халдваргүйжүүлэлтийг өргөн хүрээнд хийнэ" гэлээ.
С.Сүлд