УИХ-ын гишүүн Я.Санжмятав “Үүссэн нөхцөл байдалтай холбогдуулан онлайн хурлыг МҮХАҮТ-тай хамтран явуулж байгаа нь цаг үеэ олсон гэж харж байна. Хугацаа алдаж болохгүй асуудлыг удаа дараа өгсөн мэдэгдлүүдэд чихээ бөглөсөн юм шиг, нүд нь харалган болсон юм шиг байгаа Засгийн газарт дамжуулан УИХ-ын чуулганаар яаралтай хэлэлцүүлэх шаардлагатай гэж үзсэн. Үндэсний эрх ашиг яригдаж байгаа учраас энэ ажлыг бид хийж байна. Ялангуяа МҮХАҮТ Монголын татварыг бүрдүүлдэг гол уурхай. Тиймээс ААН-үүдийн амьдрал, хүний нөөц боловсон хүчнээ тогтвортой барих, эрсдэлийг сааруулах чиглэлээр авч хэрэгжүүлсэн санал, боловсруулсан материалтай танилцлаа. Бид ажлын хэсэгтээ МҮХАҮТ-ын зарим гишүүдийг оруулна. Засгийн газрыг эрүүл мэндийн салбар, коронавирустэй тэмцэх чиглэлээр хийсэн ажлыг нь сайшааж байна. Гэхдээ эдийн засгийн уналт хүчээ авч байгаа энэ үед бодитой алхам хийхгүй байна. Амьдрал зургадугаар сарын 24 гээд дуусгах гэж байгаа юм шиг, санал авах гэж хийж байгаа ажлаа одоо боль. Улстөржихөө болъё” гэлээ.  

УИХ дахь АН-ын зөвлөлийн дарга Д.Эрдэнэбат “Өнөөдөр зөвлөл хуралдаж, тогтоолын төслийг хэлэлцэж байна. Гишүүдийн саналаар яаралтай өргөн барих ёстой гэдэгт санал нэг байна. Ялангуяа иргэдэд тохиолдож байгаа асуудалд шуурхай шийдвэр авахгүй бол цаг хугацаа алдаж байна. Аж ахуйн нэгжүүдэд бодлогын шийдвэр үзүүлэх ёстой. Тогтоолын төслийг өнөөдөртөө багтаж өргөн барих нь зүйтэй гэж үзлээ” гэв.

Б.Лхам