АН дахиад л хөл толгой нь мэдэхгүй байдалд орж, дотоод зөрчил нь сэдэрсэн бололтой. Гэхдээ АН-ын лидер хооронд бус залуус нь намын даргаа чиглэсэн шүүмжлэл дайх болжээ. Ингэхдээ намын удирдлагуудынхаа хийж, хэрэгжүүлж байгаа үйлдэлд сэтгэл гонсгор явах болсон залуус нь түрүүчээсээ дуугарч эхэлсэн байна. Тэдгээрийн нэг нь НИТХ-ын төлөөлөгч М.Тулгат. Тэрбээр “Хэд хоног утсаа унтраагаад алга болвол битгий гайхаарай. Хэн нэгэнд өртэйдөө биш. Үзэлцэнэ, тэмцэнэ гэсэн сонгуулийн зардлаа шийдэж чадахгүй боллоо. 2000 ажилтан, нүсэр аж ахуй хагас жил сул зогсохыг төсөөлөөд үз.

Данс улаан нялга. Миний амьдралын утга учир ардчилал, либерал үзэл санаа. Ухамсарт амьдрал минь тэгж эхэлсэн. Эцсээ хүртэл тэндээ бат зогсоно. Дэмжиж ирсэн бүх хүмүүст баярлалаа бас УУЧЛААРАЙ!!!. Ялахгүй байж магадгүй ч Ардчилсан намыг дэмжээрэй.

Би бол очих нүүргүй боллоо. Нэр дэвшинэ гэж баахан давхисан. Хүн амьтанд итгэл төрүүлсэн. За тэр бол нэг хувь хүний асуудал.

АН үнэхээр шинэчлэгдэж байгаа. Бүр итгэлтэй хэлье. Тийм биш байсан бол би энд үсээ зулгаагаад суухгүй. ҮБХ 85 хувь шинэ залуус. Харамсалтай нь, АН дуугарах бүртээ буруу дуугарч оноо алдаж байна. О.Магнай иргэн бүрт 1.2 сая юу гэчих вэ... Намын байр суурь биш байх?” гэжээ.

Харин АН-ын гишүүн О.Эрдэнэ-Өрнөх “АН-аас сонгуульд нэр дэвшихэд төлөх мөнгө байгаагүй. Ингээд алсдаа болно биз гээд 2020 оны УИХ-ын сонгуульд нэр дэвшихгүй байхаар аль эрт шийдсэн. 100 сая төгрөгийн дэнчинтэй холбоотой асуудлыг намын дүрмийн дагуу “нам дотроо” яриад зогсоох буюу цуцалж чадаагүй. Олон нийтэд гаргаж яриагүй орхисон” гэсэн байна.

АН-ын гишүүн Д.Мөнх-Эрдэнэ гэхэд "99114349 энэ хэний утас вэ?. Үзэл бодлоо илэрхийлэх гэхээр мөнгө нэхээд байна яах уу?. 100 сая цаашаа? Төрийн эрхийг мөнгөөр харж байна" хэмээн бичжээ. Эндээс харахад АН-ын залуучууд эхнээсээ намын дарга С.Эрдэнэ болон удирдлагууддаа итгэл алдарч эхэлсэн бололтой. Хэдийгээр Үндэсний бодлогын хорооных нь гишүүдийн 85 хувь нь залуучуудаас бүрдсэн гэх ч сонгуульд нэр дэвших дэнчингийн мөнгө болох 100 сая төгрөгийн босго давж чадахгүй залуус нь эхнээсээ ийнхүү шантарч эхэлсэн хэрэг. Боловсролтой, нэр цэвэр залуучуудынхаа 100 сая төгрөгийн дэнчингээр хана, хэрэм босгосон С.Эрдэнэ даргын шийдвэр эцсийн дүндээ АН-ын ялагдлын эхлэл байж ч мэдэх.

С.Сүлд