"Миний бие хөдөө нөхөр, дөрвөн хүүхдийн хамт мал маллаж амьдардаг. Бусдад богтлогдож айлын эхнэр болохоос өмнө нөхрөө нэг л удаа харсан. Тэр үед би дээд сургуулиа төгсөөд аймагтаа ирчихсэн. Мэргэжлээрээ ажил олоогүй учраас хувийн компанид худалдагчаар ажиллаж байсан үе. Нэг удаа ажлаа тараад явж байтал машинтай хүн дэргэд ирж зогсоод "Хаа хүрэх вэ. Гадаа хүйтэн байна. Гэрт чинь дөхүүлж өгье" гэж хэлсэн. Би зөвшөөрч машинд суусан. Хэсэг яваад буух гэтэл ард сууж явсан залуу буюу манай нөхөр намайг буулгахгүйгээр хүчээр авч явсан.

Аймгийн төвөөс 190 гаруй км зайтай Бөхмөрөн сумын нутагт байх аав, ээжийнхээ гэрт хүчээр оруулж, аавынхаа болон өөрийнхөө гэрийн галд мөргүүлсэн. Яах ийхийн зуургүй шинэ дээл, хувцас өмсгөж, “Эмэгтэй хүн цагаан зээр хоёр нутаггүй байдаг юм. Манай хүүтэй амьдралын замаа холбо. Хүү минь муу хүн биш. Бид маргааш танай аав, ээжид хадаг сүү барьж очно” гэсэн. Хэдийгээр хүсээгүй ч, хэрэв татгалзвал насаараа жаргал үзэхгүй, ганц бие явдаг гэж хэлсэн болохоор айсан. Тэгээд уйлан байж эхнэр нь болсон.

Шөнө нь манай нөхөр хүчээр бэлгийн харьцаанд орж, удалгүй би жирэмсэн болсон.

Нэгэнт хүний эхнэр болсон учраас янз бүрийн ааш зан гаргах бүрт тэвчээд амьдарч ирсэн. Гэтэл удалгүй байнга зодож, дарамталдаг болсон. Олон удаа цагдаад гомдол гаргаж, Эрүүгийн болон Зөрчлийн тухай хуулиар арга хэмжээ авахуулж байсан. Нөхөр хоёр ч удаа намайг зодож, хүнд гэмтэл учруулсан учраас аймгийн Цагдаагийн газраас эрүүгийн хэрэг үүсгэн яллагдагчаар татаж, прокуророос яллах дүгнэлт үйлдэн шүүхэд шилжүүлсэн ч, шүүхээс хэргийг хэрэгсэхгүй болгосон.

Тухайн үед гомдолгүй гэсэн бичиг хийж өгсөн маань буруу байжээ. Би нөхөртэйгээ байнга хэрүүлтэй байж ирсэн. Гэрлэлтээ цуцлуулж дөрвөн хүүхэд болон мал, гэрээ өөртөө авмаар байна" гэж Увс аймгийн Улаангом сумын малчин эмэгтэй ярьжээ.

Энэ талаар "Монгол Улс дахь хүний эрх, эрх чөлөөний байдлын талаарх 19 дэх илтгэл"-д дурдаж бичсэн бөгөөд уг илтгэлийг энэ сарын 30-нд Хүний эрхийн Үндэсний Комиссын дарга Ж.Бямбадорж УИХ-ын дарга Г.Занданшатарт өргөж, товч танилцуулгыг хийсэн юм. Монгол Улсын Хүний эрхийн Үндэсний Комиссын тухай хуульд заасны дагуу тухайн жилийн хүний эрх, эрх чөлөөний төлөв байдлыг тодорхойлж, Монгол Улс дахь хүний эрх, эрх чөлөөний байдлын талаарх илтгэлийг жил бүрийн эхний улиралд багтаан Улсын Их Хуралд өргөн барьдаг билээ.

Мэдээний дэлгэрэнгүйг доорх холбоосоор үзнэ үү. 

http://nhrcm.gov.mn/%D0%BC%D1%8D%D0%B4%D1%8D%D1%8D/%D0%BC%D0%BE%D0%BD%D0%B3%D0%BE%D0%BB-%D1%83%D0%BB%D1%81-%D0%B4%D0%B0%D1%85%D1%8C-%D1%85%D2%AF%D0%BD%D0%B8%D0%B9-%D1%8D%D1%80%D1%85-%D1%8D%D1%80%D1%85-%D1%87%D3%A9%D0%BB%D3%A9%D3%A9%D0%BD%D0%B8%D0%B9-%D0%B1%D0%B0%D0%B9%D0%B4%D0%BB%D1%8B%D0%BD-%D0%B8%D0%BB%D1%82%D0%B3%D1%8D%D0%BB/?fbclid=IwAR1ZuzcoIDDqOIy80ZwsyNz41FvHZWRT-24Ado7PY2SCD_DcZY35zZXukCc