Хүн төрөлхтөнийг тэр чигт нь нөмрөөд буй коронавирусний цар тахлын улмаас бүтэн нэг жилээр хойшлогдож Токиогийн зуны олимпийн наадамд эх орноо төлөөлөн оролцох баг тамирчдаа дэмжих зорилгоор “Токио олимп” санг байгуулсан билээ. Тус сан зорилгынхоо хүрээнд Ерөнхий сайдын нэрэмжит цомыг орон даяар аялуулж, хандивын аян өрнүүлэх ажиллагаа Өмнөговь аймагт болж, БТСГ-ын дарга Ц.Шаравжамц аймгийн БТСГ-ын өдөр тутмын үйл ажиллагаа, шинээр баригдсан спортын барилга байгууламжуудтай танилцлаа. Энэ үеэр тэрбээр “Токио олимп” сангийн менежер Б.Өнөбаатарын хамт Ерөнхий сайдын нэрэмжит цомыг Өмнөговь аймгийн Засаг даргын орлогч Х.Батболд, ЗДТГ-ын Нийгмийн бодлогын газрын дарга Ү.Энхцацрал, БТСГ-ын дарга Б.Батсайхан нарт хүлээлгэн өгсөн юм.

Спортоор улсдаа тэргүүлэх амбийцтай өмнийн говийнхон

Өмнөговьчуудын олон жил хүлээсэн спортын шинэ ордон ашиглалтад ороод удаагүй. Шинэ ордонд сагсан бөмбөг, волейбол, чөлөөт бөх, бокс, жүдо гээд Монголдоо түгээмэл бүхий л спортын тэмцээн уралдаан, бэлтгэл сургуулилт явуулах боломжтой юм байна. Хэмжээний хувьд бусад аймгуудад байхгүй гэмээр том юм. Заал танхимаас гадна 25 метрийн усан сан байгуулсан нь говь нутаг олны хөлийн газар болсныг илтгэнэ. Говийнхныг усанд муу гэдэг ч усан сан нь байвал ямархуу усч хүмүүс болохыг харуулсан олон жишээ. Тиймдээ ч улсынхаа нэрийг дархалсан шилдэг усчид эндээс төрж гарах цаг холгүй байхдаа гэсэн бодол эрхгүй төрсөн юм.

Спортын ордны материаллаг бааз, тоноглолыг хэний ч нүүр улайхааргүй тоноглосон байх. Өмнөговьчуудын амбийц зөвхөн дотоодын тэмцээн уралдаанаар хязгаарлагдахгүй бололтой. Наандаж л Номгон суманд л гэхэд зарим аймагт ч байхгүй спортын ордон мөн л барьж.

Хүүхэд залуучууд спортоор байнга хичээллэдэг учир хөл хөдөлгөөн огтхон ч тасардаггүй гэнэ. Харин шинэ төрлийн коронавирусээс болж аймаг даяар хөл хорио тогтоосон учир одоохондоо эл хуль.

Ер нь өмнийн говьчууд бусад аймагтай харьцуулахад илүү спортлог гэдэг нь аймгийн угтах хаалгаар орж ирэхээс анзаарагдаж байв.

Аймгийн төвөөс угтах хаалга хүртэл багагүй зайтай. Гэтэл энэ зайд бүх нийтээрээ гүйдэг уламжлал тогтоод удаж байгаа гэнэ. Гудамжаар нь машин тэрэг дүүрэн. Гэхдээ бусад аймгийн төвд мотоцикл хөлөглөх залуус их байдаг бол Даланзадгадад ийм байдал харагдсангүй. Харин унадаг дугуйтай залуус олон ажээ. Урин цаг наашилж, гадаа дулаарсан болоод тэр үү, унадаг дугуй хөлөглөх залуус гудамжаар нэг байхаас гадна дасгал хөдөлгөөн хийж байгаа хүмүүс ч олон харагдав.

Олимпийн мөрөөдлөө эх орны өмнөд цэгт даатгалаа

Аймгийн удирдлагуудтай уулзах үеэр БТСГ-ын дарга Ц.Шаравжамц  “Ерөнхий сайдын нэрэмжит цомыг эх орныхоо захын дөрвөн цэгт аваачиж хүсэл юугаа даатгах нууцхан бодолтой”-гоо үгийн далимд дуулгасан нь юу юугүй ажил хэрэг болоод явчихав. Монгол хүн амны бэлгээр гэдэг. Засаг даргын орлогч Х.Батболд бидний хэрэг зоригийг сонсоод “Очих газар хол, зам мэдэхгүй хүмүүс төөрөх аюултай” хэмээн анхааруулж, сүүлдээ өөрөө замчлан хэрэг зоригийг нь бүтээж өгөхөөр болсон юм.

Говь нутагт нар эрт манддаг. Маргааш өдрийнх нь ургахын улаан нарнаар Х.Батболд дарга биднийг буусан буудлаас авч, арван жилд байхдаа газар зүйн хичээл дээр цээжлүүлж байсан дөрвөн газрын нэг болох Орвог гашууны бор толгойн зүг довтолгосон юм. Аймгийн төвөөс зорьсон газар нэлээд зайтай. Шороон замаар төдий түргэнгүй явсаар морь цагт хилийн застав дээр ирэв. Заставын дарга А.Гэрэлмөнхөд учир явдлаа хэлж, зөвшөөрсний дараа бид цомоо аван Орвог гашууны бор толгой дээр гарч зорилгоо биелүүлсэн юм. Хилийн торгон зааг дээр очих зөвшөөрлийг басчиг олон хүнд өгдөггүй учиртай.

Монгол орны хамгийн өмнөд цэг дэх сүлдэт баганаас хамт яваа багийнхан маань адис авч Монголын баг тамирчдыг олимпоос олон медаль авч, аварга төрөх зам мөрийг тэгшитгэхийг залбиран даатгасан юм. Толгойгоос бууж машин дээрээ ирэхэд төрийн дуулал эгшиглэж таарсан. Энэ үед БТСГ-ын дарга Ц.Шаравжамц, заставын дарга А.Гэрэлмөнх нар гараа зүрхэн тушаа авч, номхон зогсон хүндэтгэл үзүүлсэн нь содон байсан. Дайны цагт цэргүүд эх орноо хамгаалдаг бол энхийн цагт тамирчид эх орныхоо нэрийг мандуулдаг гэдэг үгийг энэ явдал санагдуулсан юм.   

Орвог гашууны бор толгойд очих замдаа аймгийн түүх соёлын нэгэн дурсгал болох эртний хадны бичээс болон 200 жилийн өмнө суулгасан торойн төглийг үзэж сонирхов. А.Гэрэлмөнх дарга сум орныхоо үүх түүхийг маш сайн мэдэх ба зам зуурт бидэнд бахархан ярилцаж явлаа.

Ийнхүү “Токио олимп” сангийн цомын улсынхаа баг тамирчдаа дэмжих аян эх орны маань хамгийн өмнөд цэг болох Орвог гашууны бор толгойгоос гараагаа авч хамгийн хойд, баруун, зүүн зэрэг цэгүүд хүртэл аймаг болгоноор айлчлах гэж байна.

Б.Жаргал