Монгол Улсаас Америкийн Нэгдсэн Улсад суух Онц бөгөөд Бүрэн эрхт Элчин сайд Ё.Отгонбаяр АНУ-ын нөхцөл байдлын талаар МҮОНРТВ-д тодруулга өглөө. Тэрбээр "Халдвар Америкт эрчимтэй тархаж байна. Гэхдээ ирэх сараас буурах байх гэсэн судалгааг зарим эрдэмтэд гаргасан. Өнөөдрийн байдлаар 170 мянган хүн халдвар авсан.

Гэхдээ энэ бол АНУ-ын нийт хүн амын 0.5 хувь. Халдварын 50 хувь нь Нью-Иорк хотод бүртгэгдсэн. Монголд байгаа иргэдэд хандаж хэлэхэд их тоо харж санаа зовохын оронд халдвар тархаж байгаа муж дахь тоог харж бодитоор үнэлэлт дүгнэлт өгөөрэй. Өнөөдрийн байдлаар 1162 хүн буцах хүсэлтээ гаргасан. Гэхдээ Туркийн онгоцноос дахин халдвар гарсантай холбогдуулан тусгай үүргийн онгоц ирүүлэх асуудал хойшлогдсон. Ази иргэдийг ялгаварлан гадуурхах явдал цөөнгүй гарсан. Гэхдээ манай улсын иргэд ийм халдлагад өртөөгүй. Гэсэн ч шаардлагагүй үед гэрээсээ гарахгүй байх, олон нийтийн газраар явахгүй байх, хувийн ариун цэврийг сахиж амь нас, эрүүл мэндээ хамгаалахыг хүсье.

Элчин сайдын яаманд хөл хорио тогтоож, онлайнаар иргэддээ үйлчилж байна. Тиймээс шаардлагатай тохиолдолд Элчин сайдын яамны утсаар эсвэл цахимаар холбогдох боломжтой гэлээ. 

Г.Маргад