Туркийн Истанбул хот дахь Монголын Элчин сайдын яамны хоёр ажилтан сэтгэцэд нөлөөлөх бэлдмэл  тээвэрлэсэн гэх асуудлыг тус улсын прокурорын газраас шалгаж эхэлсэн тухай манай сайт мэдээлсэн билээ. Үүнтэй холбоотойгоор Монгол дахь Туркийн Элчин сайдын яамнаас Гадаад харилцааны яаманд ноот бичиг хүргүүлжээ. Ноот бичигт Истанбул хот дахь Монголын Элчин сайдын яамны хоёр ажилтныг сэтгэцэд нөлөөлөх бэлдмэл тээвэрлэсэн гэх хэрэгт холбогдуулж, тус улсын прокурорын газраас шалгах зөвшөөрөл хүссэн тухай дурдсан байна.

Гэвч Гадаад харилцааны яамнаас ноот бичгийг тас нуусан бололтой. Харин уг мэдээлэл олон нийтэд ил болсны дараа сайд Д.Цогтбаатар яаран тайлбар өгчээ.

Тэрбээр "Хууль зүйн яамтай холбогдож, хуулийн зөвлөгөө, туслалцаа хүсээд хамтран ажиллаж байна. Хувь хүний нууцтай холбоотой учраас ямар гэмт хэрэгт холбогдсоныг нь тодорхой мэдээлэх боломжгүй" гэжээ.

Мөн дипломат ажилтнууд холбогдсон гэх асуудлыг үгүйсгэсэн байна. Эндээс харахад сэтгэцэд нөлөөлөх бэлдмэл тээвэрлэж яваад саатуулагдан, шалгагдаж эхэлсэн Монголын хоёр дипломатыг шалгах хүсэлт бүхий Туркийн Элчин сайдын яамнаас ирүүлсэн ноот бичгийг Гадаад харилцааны яам яагаад нуув гэсэн асуулт дагуулж байна.

Д.Цогтбаатар сайдын хэлсэн үг үнэн л юм бол Туркийн Элчин сайдын яамнаас хүргүүлсэн ноот бичгийг олон нийтэд ил болгож, нуусан шалтгаан, холбогдох тайлбараа өгөх ёстой.

Тэгээд ч Монгол Улсын нэрийн өмнөөс гадаадад албан үүрэг гүйцэтгэж яваад гэмт хэрэгт холбогдсон асуудлыг нууж хаагаад байх зүйл байхгүй болов уу. Ялангуяа дипломат албанд. Учир нь, тэнд хувь хүний гэхээсээ бүхэл бүтэн улсын нэр хүнд давхар явдаг болохоор тэр.

С.Сүлд