Өнөөдөр Туркээс ирсэн гурван хүний хоёрооё нь коронавирусний халдвар илэрсэн талаар Эрүүл мэндийн яамнаас мэдээлсэн. Үүнтэй холбогдуулан гаднын иргэдийг оруулж ирлээ. Мөн тусгай үүргийн нислэгээр ихэвчлэн нөлөө бүхий албан тушаалтнуудын гэр бүл ирж байна гэсэн шүүмжлэл иргэдийн дунд гараад буй.

Энэ талаар Гадаад халицааны яамны Консулын газрын захирал Л.Мөнхтүшиг "Монгол Улсын ямар ч иргэн тасалбараа захиалсан нь л бол хэний хүүхэд байх нь хамаагүй авчирч байгаа.

Туркийн хоёр иргэнтэй холбоотой асуудлаар мэргэжлийн байгууллага нь албан ёсоор мэдээлэл өгсөн. Мөн ямар тохиолдолд гадаадын иргэнийг нэвтрүүлэх талаар заасан байдаг. Тухайлбал, Монгол Улсад байнга оршин суудаг, хөдөлмөр эрхэлдэг, манай улсын иргэнтэй гэр бүл болсон, Элчин сайдлны яамны ажилтан болон түүний гэр бүлийг нэвтрүүлэх заалттай.

Сөүлд манай улсын 48 мянган иргэн ажиллаж, амьдардаг. Эхний нислэгээр ирэх иргэдийг ЭСЯ-нд бүртгэхэд 500 хүн хоёр хоногийн хугацаанд өөрсдөө бүртгүүлсэн. Улмаар эхний нислэгээр 250 хүнийг авч байгаа гэдгийг ойлгох хэрэгтэй. Ингэхдээ нэн хүндэтгэн үзэх шалтгаантай иргэдийг ирүүлнэ. Түүнчлэн ЭСЯ-нд иргэд тасралтгүй хандаж байсан учраас шалтгаан заахгүй бүртгэсэн. Токиогийн нислэгийн хувьд хүндэтгэн үзэх шалтгаантай иргэдийг нэг бүрчлэн бүртгэсэн. Дараагийн нислэгээр хандсан иргэн бүрийг бүртгэлжүүлсэн" гэлээ. 

Иргэдийн гаргаж байгаа шүүмжлэлтэй холбогдуулан Сөүл, Токиогийн нислэгээр ямар хүмүүс ирэх талаар урьдчилсан судалгаа хийжээ. Тодруулбал, Сөүлээс өндөр настай асран хамгаалагчтай 40 гаруй иргэн, эрүүл мэндийн шалтгаантай 100 гаруй иргэн, жирэмсэн 19, бага насны хүүхэдтэй 56, гэр бүл хөгжлийн бэрхшээлтэй таван иргэн захиалга өгчээ.

Токиогоос ирэх иргэдийн хувьд өндөр настай 30 гаруй иргэн, эрүүл мэндийн шалтгаантай 10, бага насны хүүхэдтэй 36 иргэн, дамжин ирж байгаа 50 иргэн, жирэмсэн дөрөв, бусад 120 иргэн ирнэ гэсэн урьдчилсан мэдээлэл гаргажээ. 

А.Сүх