"Капитал" банкны хувь эзэмшигч, Бишрэлт группийн ерөнхийлөгч, УИХ-ын гишүүн Б.Ундармаагийн нөхөр Б.Ариунболдыг өнгөрсөн 2019 оны дөрөвдүгээр сарын 30-нд АТГ-аас баривчилж, ШШГЕГ-ын Цагдан хорих 461 дүгээр ангид хорьсон билээ.

АТГ-аас ийн шуурхай арга хэмжээ авсан шалтгаан нь "Капитал" банк дампуурлаа зарласны дараа хадгаламж эзэмшигч, харилцагч нарын мөнгө болон төрийн мөнгийг үгүй хийж, ихээхэн хэмжээний хохирол учруулсан гэх хэрэгт хууль хяналтын байгууллагаас тус банкны удирдлагуудыг ийн цагдан хорьж шалгаж эхэлсэн юм. 

УИХ-ын гишүүн Б.Ундармаа Их хурлын гишүүн болохдоо АТГ-т тус банкны дийлэнх хувьцаа эзэмшигч болохоо хөрөнгө орлогын мэдүүлэгтээ мэдүүлсэн байдаг. Гэвч банк дампуурсан дараа тус банктай ямар ч холбоогүй гэж хэдэнтээ мэдэгдсэн нь олон нийтийн дургүйцлийг төрүүлсэн юм.

Юутай ч хууль хяналтын байгууллагад байгаа баримтаар дампуурсан "Капитал" банк нь УИХ-ын гишүүн Б.Ундармаа болон түүний гэр бүлд хамааралтай болх нь ил болсон. Тэгвэл Нийгмийн даатгалын ерөнхий газрын хохирлын мөнгө болох 104.2 тэрбум гаруй төгрөгийн мөнгийг “Капитал”-аас нэн тэргүүнд гаргуулах шийдвэрийг шүүхээс гаргасан байна.

Тодруулбал, Нийгмийн даатгалын ерөнхий газрын удирдах албан тушаалтнууд тэдний итгэмжлэгдсэн төлөөлөгч, өмгөөлөгч нарын нэхэмжлэлтэй, "Капитал" банкны эрх хүлээн авагчдад холбогдох, тус банкнаас төлбөр авагч нарт олгох дарааллыг үндэслэлгүй тогтоосныг өөрчлүүлэх гомдлыг нийслэл дэх Захиргааны хэргийн анхан шатны шүүхэд хянан хэлэлцлээ. Банкны тухай хуулийн 73 дугаар зүйлд банкны хөрөнгийг худалдан борлуулсны орлогоос нэхэмжлэлийн шаардлага хангахдаа баримтлах дарааллыг хуульчилсан байдаг. Харин "Капитал" банк-ны эрх хүлээн авагч Нийгмийн даатгалын сангийн хөрөнгийг олгох дарааллыг тогтоохдоо хууль зөрчсөн гэж нэхэмжлэгч тал үзсэн юм.

Өөрөөр хэлбэл, НДЕГ-т хамаарах нийт 104.2 тэрбум гаруй төгрөгийг Банкны тухай хуулийн 73.1.5-т заасан дараалалд хамруулан бүртгэхийг даалгах” хэмээжээ.

Нийслэл дэх Захиргааны хэргийн анхан шатны шүүх нэхэмжлэгч, хариуцагчдын гаргасан тайлбар, банкны эрх хүлээн авагч, НДЕГ-тай байгуулсан гэрээ зэрэг нотлох баримтуудыг үндэслэн нэхэмжлэгчийн шаардлагыг бүхэлд нь хангаж шийдвэрлэв.

Тухайлбал, Банкны тухай хуулийн 73.1.5-т заасныг баримтлан нэхэмжлэлийн шаардлагыг хангаж, Нийгмийн даатгалын сангийн "Капитал" банк ХХК-д байршиж байсан мөнгөн хадгаламжийн 104 тэрбум 206 сая төгрөгийг Банкны тухай хуулийн 73.1.8-т заасан Засгийн газар төлөх өр төлбөр, албан татвар гэсэн дараалалд оруулсныг хүчингүй болгож, мөн хуулийн 73.1.5-т зааснаар даатгагдаагүй хадгаламжийн төлбөрийн дараалалд оруулахыг тус банкны эрх хүлээн авагчид даалгасан байна.

Г.Маргад