Монгол Улсын Ерөнхийлөгч асан Ц.Элбэгдорж цахим орчинд хамгийн идэвхтэй улстөрчдийн нэг. Түүнийг өнгөрсөн 2019 оны арванхоёрдугаар сард Монгол Улсын хилээр гарахаас өмнө Тавантолгойн асуудлаар хуулийн байгууллагаас шалгаж байгаа, АТГ-аас мэдүүлэг авахаар дуудлаа гэх мэдээлэл цацагдаж эхэлсэн. Тухайн үед тэрбээр "Хууль дуудвал гутлаа тослоод зангиагаа зүүгээд очих ёстой" гэж мэдэгдэж байсан ч үүнээс төд удалгүй олон улсын хуралд суух нэрээр улсын хилээр гарсан юм.

Түүний байгаа байршлыг ЗГХЭГ-ын дарга Л.Оюун-Эрдэнэ Америкт тансаг буудалд тунхалж суугаа гэж мэдэгсэн бол үүнээс хэдхэн хоногийн дараа БНСУ-д байгаа нь ил болж түүгээр зогсохгүй тусгай үүргийн онгоцоор эргэн ирэх хүсэлтэй байгаагаа цахимаа мэдэгдсэн удаатай. Энэ үеэс хойш олны анхаарлыг татсан мэдэгдэл, мэдээлэл хийх болсон тэрбээр ирэх 2021 онд болох Ерөнхийлөгчийн сонгуульд өрсөлдөнө гэдгээ мэдэгдлээ. 

Тэрбээр "Нутгийн зүг хөлгийн жолоо залахад бэлэн боллоо. УБ-аас Токиод МИАТ-ын онгоц буух сайхан мэдээ сонслоо. Эх нутагтаа очих сургаар над руу ирэх дайралт ширүүсч байна. Ийм юм надад улам эрч хүч нэмж, намайг хурцалдаг юм. Цаг болж. Би доорхи маягаар хариу барихаар шийдлээ. Болгооно уу гээд Ерөнхийлөгч Х.Баттулга Ерөнхийлөгчийн сонгуульд дахин нэр дэвшвэл өрсөлдөхөө мэдэгдсэн байна. 

Хэдийгээр ийн цахим хуудсаараа дамжуулан мэдэгдсэн нь албан ёсны байр суурь биш ч гэлээ хэрвээ зээ, энэ нь үнэн байгаад үнэхээр Ерөнхийлөгчийн сонгуульд өрсөлдвөл түүнд боломж байхгүй гэдгийг сайтар ухаарч байгаа нь лавтай. Учир нь төрийн эрхэнд байсан өмнөх үеийн дөрвөн Ерөнхийлөгчөөс Ц.Элбэгдорж хамгийн ретинг муутайд тооцогддог юм. Тиймээс энэ удаагийн "мэдэгдэл" нь олны анхаарлыг татах гэсэн, магад хууль хүчний байгууллагын хяналтын ажиллагаанд хөндлөнгөөс бага ч гэсэн нөлөөлөл байхыг үгүйсгэхгүй юм. 

Г.Маргад