Өнгөрсөн амралтын өдрүүдэд Тээврийн цагдаагийн албаны Жижүүрийн шуурхай удирдлагын хэлтэс нийт 676 дуудлага мэдээлэл хүлээн авснаас зам тээврийн ослын шинжтэй 492 дуудлага мэдээлэл бүртгэгджээ.
Бүртгэгдсэн зам тээврийн ослын улмаас 10 хүн гэмтсэний хоёр хүүхэд байна. Ноцтой зам тээврийн ослын улмаас орон нутагт нэг хүүхдийн амь нас хохирсон байна.
Тухайлбал, өнгөрсөн гуравдугаар сарын 31-ний өдрийн 18.00 цагийн орчим Баянхонгор аймгийн Гурван булаг сумын II багийн нутаг “Цэлгэрийн бууц” гэх газар шороон замд улсын дугааргүй UB MOTO маркийн Г жолоочтой мотоцикл онхолдож, жолооч 13 настай, эрэгтэй Г эмнэлэгт хүргэгдэн эмчлүүлж байгаад өчигдөр өдөр нас барсан хэргийг шалгаж байна.
Мөн алба хаагчдаас хийсэн хяналт шалгалтын үеэр согтуугаар тээврийн хэрэгсэл жолоодсон 82 жолоочийг илрүүлж, эрхгүй үедээ согтуугаар тээврийн хэрэгсэл жолоодсон 8 хүнийг шүүхээр баривчилж хуулийн дагуу хариуцлага тооцсон байна.
Нийт замын хөдөлгөөнд оролцогч та бүхэн зам, орчны нөхцөл байдалд тохируулан хурдаа сонгож хөдөлгөөнд оролцох, эгнээ байраа зөв эзэлж, өөрийн болон бусдын амь нас, эрүүл мэнд, эд хөрөнгийг хамгаалж, замын хөдөлгөөний дүрмээ биелүүлж, согтууруулах ундаа хэрэглэсэн үедээ тээврийн хэрэгсэл жолоодохгүй байхыг анхааруулж байна.