Ерөнхийлөгч асан Ц.Элбэгдоржийг энэ сарын 3-ний өдөр буюу өнөөдөр Улаанбаатар-Токио чиглэлийн тусгай үүргийн онгоцоор Монголд ирсэн даруйд цагдан хорьж, шалгана гэдэг мэдээлэл цацагдсан. Тодруулбал, тусгай үүргийн онгоц өнөөдөр 15.47 цагт Улаанбаатарт газардах юм.
Тэгвэл энэ талаар АТГ-ын Олон нийттэй харилцах асуудал хариуцсан ахлах комиссар Т.Баярхүүгээс тодруулахад "Эрүүгийн хуулийн ерөнхий ангийн 1.8 дугаар зүйлийн 1, 2002 оны Эрүүгийн хуулийн 263.2-т зааснаар эрүүгийн хэрэг үүсгэн 2020 оны нэгдүгээр сарын 30-ний өдөр яллагдагчаар татсан. Тухайн иргэнд яллагдагчаар татсан тогтоолыг танилцуулж, холбогдох мөрдөн шалгах ажиллагаа хийх гэсэн боловч 2019 оны аравдугаар сарын 7-ны өдөр Монгол Улсын хилээр гарсан байсан. Энэ утгаараа мөрдөн шалгах ажиллагаа хийх боломжгүй болсон.
Энэ хугацаанд прокуророос гурван удаа дуудах хуудсыг түүний төрсөн хүү болон байнга оршин суух хаяг руу нь хүргүүлсэн. Гэвч ирээгүй учир хуулийн дагуу 2020 оны хоёрдугаар сард байршил тогтоох хүсэлт илгээж хариу авсан. Зарим хэвлэл мэдээллийн хэрэгслээр Монголд ирэнгүүт нь баривчилна гэдэг мэдээ гарсан. Гэтэл дэлхий нийтэд коронавирусний цар тахал тархаад байна. Үүнтэй холбогдуулан УОК-ын шийдвэрээр гаднаас ирсэн иргэдийг 21 хоног тусгаарлах ёстой.
Ийм цаг үед шууд баривчлах боломжгүй. Тусгаарлах байранд 21 хоног байлгасны дараа хэрэг мөрдөн шалгах ажиллагаа хэвийн үргэлжилнэ" гэлээ.
Г.Маргад
Сэтгэгдэл (38)