Токио-Улаанбаатар чиглэлийн тусгай үүргийн онгоцоор Ерөнхийлөгч асан Ц.Элбэгдорж болон их аварга Д.Дагвадорж тэргүүтэй 266 зорчигч энэ сарын 3-нд ирсэн билээ. Дээрх иргэдээс хоёр хүн халуурсан тул нийт 57 иргэнийг ХӨСҮТ-д тусгаарлахаар болсон юм. 

Тусгаарлагдсан иргэдийн нэг нь их аварга Д.Дагвадорж бөгөөд эрсдэл өндөртэй гадаад улсаас дамжин ирсэн иргэдтэй хамт тусгаарлагдахгүй гэж дургүйцсэн байна. Тэрбээр энэ талаараа өөрийн цахим хуудсаараа дамжуулан мэдэгдсэн.

Гэхдээ түүний мэдэгдэл тайлбар дундаас "Энгийн иргэд ХӨСҮТ. МАН-ын дарга нар хүүхдүүдээ хар машинаар тосуулаад авдаг юм байна. Шударга ёс зүй энэ үү даргад үйлчилсэн УОК-ын хурган дарга нараа" гэж бичснийг онцолж харахгүй байхын аргагүй байлаа. 

Ерөнхийлөгч асан Ц.Элбэгдоржийн хувьд Америкийн нэгдсэн улсаас Японд улсад очиж улмаар Монголд ирсэн. Энэ утгаараа эрсдэл бүхий гэсэн ангилалд багтахаас аргагүй. Улсын онцгой комиссын шийдвэрээр гадаадаас ирсэн иргэдийг ХӨСҮТ болон бусад эмнэлэг, сувилал тусгаарлах ёстой.

Гэтэл Ц.Элбэгдоржийг Корпорейт зочид буудалд тусгаарласан гэх шуум цацагдах болов.

Хэдийгээр баттай мэдээлэл биш ч гэлээ ийм байх боломжтой. Учир нь Улсын онцгой комиссын Шуурхай штабаас зарим томоохон зочид буудалд иргэдийг тусгаарлах хүсэлт гаргаж, үнэ хөлсийг тохирно гэдгийг мэдэгдэж байсан удаатай. Энэ ч утгаараа "Токио Инн", "Корпорэйт" гэсэн өндөр үнэтэй зочид буудалд энэ удаагийн нислэгээр ирэх зарим иргэнийг байршуулна гэж мөн л мэдэгдсэн.

Болсон бүх процессоос үзвэл, улстөрч болоод бизнесмэн эсвэл тэдгээрийн үр хүүхэд гадаадаас ирвэл тухтай газар байлгах гэсэн санаа гэж хардахаар. Энэ хардлага баталгаатай байх магадлалтайг өнгөрсөн хугацаанд болсон олон үйл явдал баталсан. Наандаж л зарим иргэд тусгаарлагдсан орчноос эхлээд хоол ундаа чамлах бүр усанд орох шүршүүрт хүртэл нэхсэн удаатай. Тэдгээр нь энгийн бус хөрөнгө чинээтэй, эрх мэдэлтэй хүмүүс байсан гэдгийг зарим эх сурвалж өгүүлж буй.

Энэ бүхнээс үзвэл, Их аварга Д.Дагвадоржийн гомдол, тайлбар үнэний ортой байх магадлалтай юм.  

Хэрвээ үнэхээр томчууд үр хүүхдээ тусгаарлах автобусаар бус тусгай автомашинаар тээвэрлэж авч явсан бол Улсын онцгой комиссын шийдвэрийг зөрчсөн үйлдэл болно. Тиймээс хайнаа хагалж үнэхээр тийм зүйл болсон эсэхийг тодруулж олон нийтэд мэдээлэх ёстойг холбогдох албаныханд онцолж хэлмээр байна.

Г.Маргад