COVID-19 халдвар АНУ, Итали, Испани зэрэг улсуудад голомтлон тархаж байгаа талаар мэргэжилтнүүд онцолж байгаа.
Тухайлбал, АНУ-д өвчлөл эрчимтэй нэмэгдэж байгаа бөгөөд Нью-Йорк хотод нэг өдрийн дотор 6500 шинэ тохиолдол бүртгэгджээ. Өвчтөнүүдийг хээрийн эмнэлэгт хүлээн авч эхэлсэн байна. Мөн нийтийн болон хувийн эмнэлэгт хэрэглэгдэхгүй байгаа амьсгалын аппаратыг шаардлагатай газарт нь хүргэх шийдвэр гарчээ. АНУ-ын Ерөнхийлөгч өнгөрсөн баасан гарагт хийсэн мэдээлэлдээ иргэдийг маск сайн зүүж, зайнаас харьцахыг уриалсан. Ингэхдээ даавуун материалаар хийсэн амны хаалт зүүх ёстой гэжээ. БНХАУ-ын хувьд шинж тэмдэггүй 60 тохиолдол бүртгэсэн байна.
Харин Испани улсад коронавирусний тохиолдол сүүлийн 24 цагийн байдлаар 7472 шинээр бүртгэгдэж, илэрсэн тохиолдол 117.710-д хүрлээ. Нас барсан хүний тоо 932-оор нэмэгдэж нийт нас баралтын хэмжээ 10.935, эдгэрч эмнэлгээс гарсан хүний тоо 30.513 буюу нийт тохиолдлын 25.9 хувийг эзэлж байна.