УИХ-ын гишүүн Б.Батзориг УИХ-ын гишүүний бүрэн эрхээсээ чөлөөлөгдөх хүсэлт гаргаснаар МАН-ын зүгээс Д.Гантулга, Н.Номтойбаяр гэсэн гурван гишүүний суудлаа алдлаа. Цахим хуудсаараа дамжуулж уйлж, уурлах цаг биш гээд Монгол түмнээс уучлалт гуйсан түүний эл хүсэлтийг өнөөдөр 12.00 цагаас нээлтээ хийх чуулганаар хэлэлцэнэ гэх мэдээлэл бий.

Цагтаа ЖДҮХС-гийн мөнгийг баруун солгойгүй тараасан гэх хэргийн толгойлогч, бас гардан гүйцэтгэгчээр тодорч, нийгэмд адлагдсан тэрбээр ийм шийдвэр гаргасан нь МАН-аа хамгаалж ЖДҮ-гийн золигт золиослогдож байна уу гэж хардахаар байна.

Учир нь эрх баригч МАН-аас Их хуралд дэвшсэн нэр бүхий 40 гаруй гишүүн ЖДҮХС-гаас зээл авсан нь баримтаар тогтоогдсон билээ. Тэдгээрийн зарим нь ББСБ-д оруулж мөнгө хүүлсэн, зориулалтын бусаар зарцуулсан ингэхдээ зарим нь бүр УИХ-ын гишүүний суудлаа барьцаалсан гэх ЖДҮ-гийн хэрэг АТГ, прокурорын хаалга давсан ч шүүхийн хаалга татаж чадалгүй хоёр жил гаруй болж буй юм.

Тухайн үед УЕП асан Б.Энх-Амгалан Их хурлын гишүүн Г.Солтан, Б.Ундармаа, Д.Дамба-Очир, Л.Энхболд нарын бүрэн эрхийг түдгэлзүүлж шалгах асуудлыг УИХ-аар оруулсан ч МАН-ынхан ЖДҮ-чдээ хамгаалж, хаацайлж өнгөрсөн юм.

 Тухайн үед ЖДҮ-чдээс хариуцлага нэхэх иргэдийн хөдөлгөөн эрчимжиж байсан ч өнөөдөр мартагдах тал руугаа хазайжээ. Шударга бустай тэмцэнэ гэж хэдэнтээ тэмдэглэж байсан Ерөнхий сайд У.Хүрэлсүх ч “Өрөө төл, иргэдээс уучлалт гуй. Чадахгүй бол ирэх сонгуульд нэр дэвшүүлэхгүй” гэснээс өөр дорвитой арга хэмжээ авсангүй. Уг нь ЖДҮХС-ийн зээлийг жижиг, дунд үйлдвэрлэл эрхлэгчдийг дэмжих зорилгоор олгодог. Энэ утгаараа зээлийн хүү нь хүртэл хамгийн бага байдаг.

Гэтэл УИХ-ын 45 гишүүн өөрийн давуу байдлаа ашиглан, нөлөөлж зээл авсан нь ард түмнээс хулгай хийсэн үйлдэл гэдгийг бусад нь гишүүд ил цагаан хэлж, шүүмжилж, эдийн засагч, хуульчдаас эхлээд ард түмний элэг доог болсон. Гэвч зээл авсан гишүүдийн нүүр огтхон ч улалзсангүй.

Эндээс л “Улстөрчдийн нүүр нь ч, өгзөг нь ч улайдаггүй” гэдэг үг үнэний ортой мэт харагсан гэхэд болно.

Намын даргынхаа даалгавраар ганц нэг нь албан ёсоор уучлалт гуйсан. Бусад нь харин өнөөдрийг хүртэл ичээндээ хярж, ирэх сонгуульдаа чимээгүйхэн бэлтгэсээр. Энэ зуур нь Б.Батзориг гишүүн хуулийн дагуу шалгуулахаа хүссэн нь нэг талаасаа МАН-ын цээжээрээ хамгаалах гэсэн эс бөгөөс ЖДҮ-гийн хэргийг нэг тийш нь эцэслэх гэсэн үйлдэл байхыг үгүйсгэхгүй.

Нөгөө талаар ЖДҮ-ийн асуудалд МАН нэг хүнээр туг тахиж, бусад гишүүдээ хамгаалж үлдвэл ёс зүйгүй нам гэдгээ харуулах болно.

Хамгийн гол нь хэрвээ Б.Батзориг гишүүн ангийн нөхдөө хамгаалж, хэргийг нь даавал ЖДҮ-чин гишүүд түүнд багагүй өртэй болох нь лавтай. Энэ бүхнээс үзвэл, тэрбээр яггүй сайтар төлөвлөж тооцоолсны үндсэн дээр ийм шийдвэр гаргасан нь ойлгомжтой. Түүнчлэн Ерөнхий сайд У.Хүрэлсүх хууль бус зүйлтэй нэр холбогдсон гишүүдийг нэр дэвшүүлэхгүй гэж мэдэгдсэн. Гэхдээ түүний эл мэдэгдэл попорсон, олон нийтэд таалагдах гэсэн өнгөцхөн зүйл байсан нь эхнээсээ ил болоод буй. Учир нь ЖДҮ-чин гишүүд хэдийнэ сонгуулийн бэлтгэлээ хангаад эхэлчихсэн, зарим нь бүр тойргоо услаж явна лээ. Эндээс үзвэл, Б.Батзоригоор туг тахих замаар ЖДҮ-гийн хэргийг хаах гэсэн Ерөнхий сайд У.Хүрэлсүхийн санаархал бололтой юм.  

ЖДҮХС-гаас зээл авахсан, авахад нөлөөлсөн гишүүдийг танилцуулбал,

УИХ-ын дарга Г.Занданшатар “Асрал” ХХК, “Эмийн үйлдвэр” ХХК, “Путь” ХХК, “Хөх цэнхэр нуур” ХХК,

Г.Тэмүүлэн, Ё.Баатарбилэг “Хүй толгой” трейд ХХК, “Мөрөн агро” ХХК, “Тангад бадмаараг” ХХК, /иргэн Тэрбиш, Анхням, Батцэцэг, Батболд/,

гишүүн асан Д.Гантулга “Азийн говь” ХХК,

Д.Тэрбишдагва “Арвай бүрд” ХХК, “Хөх үзүүр” ХХК, УИХ-ын гишүүн Б.Бат-Эрдэнэ  “Баруун зүүн эх сувилал” ХХК,

Ж.Бат-Эрдэнэ “Бүрэн луу” ХХК,

А.Сүхбат “Дархан таван нуур” ХХК,

Д.Хаянхярваа “Дархан-Эрдэнэ мах комбинат” ХХК,

Ц.Мөнх-Оргил “KOMGL” ХХК,

Ц.Даваасүрэн “Нарлаг хараа” ХХК,

М.Билэгт “Өндөр бадрах” ХХК,

Д.Оюунхорол “Саруул хангай чөлөөт бүс" ХХК,

Б.Энх-Амгалан “Таятан фүүд” ХХК,

О.Батнасан “Tоп кондитар” ХХК,

С.Чинзориг /Иргэн Ууганбаяр, Оюунцэцэг, Анхбаяр, Түмэннаст/ “Өвөр баян бүрд” ХХК, “Тунгалаг онги” ХХК,

О.Амарзаяа “Ханан энгэр" хоршоо, "Хатан хармаг" ХХК,

С.Бямбацогт “Цант Алтай” ХХК,

Ц.Цогзолмаа “Ширээт онон” ХХК,

Т.Аюурсайхан “ЖБГУ” ХХК,

Ө.Энхтүвшин “Нью аниверса” ХХК,

Н.Энхболд “Өлзий дэн” ХХК,

Я.Санжмятав “Фрейш эйр” ХХК,

Л.Энхболд “Хас говь транс говь” ХХК,

Б.Ундармаа  “Доктор мэйк” ХХК,

Г.Солтан “Монгол шаазан" ХХК,

Д.Дамба-Очир “Сапфир стоун” ХХК,

Х.Нямбаатар “Өгөөдэй ази” ХХК, иргэн Пүрэвсүрэн,

Г.Мөнхцэцэг “СОНЭ’’ХХК,

Б.Баттөмөр “Мондем” ХХК,

Ш.Раднаасэд “Гэга"," Гэрдсанаа" "Дэл гэр баян говь, "Сэлши үүр”, "Алиман төгс буян" ХХК,

Х.Баделхан “Мон лойс" ХХК, "Асена" ХХК, "Хаганат",

Б.Жавхлан “Пример” инвестмэнт ХХК, ‘Жете майнинг” ХХК. “Алтан-Олом” ХХК,

Я.Содбаатар “Эпато анарваан” ХХК,

Ж.Энхбаяр "Газар буудай” ХХК, Л.Энх-Амгалан Иргэн Мөнхдөл,

Ж.Ганбаатар “Марал буян групп” ХХК,

Н.Оюундарь “Ред стар клуб” ХХК,

Б.Саранчимэг “Сингапур хейлт кейр” ХХК,

Т.Тогтохсүрэн “Өв сор хангай” ХХК,

Н.Учрал “Хүннү” ХХК,

М.Энхболд “Нүүдэлчин агро ферм” ХХК,

Ж.Батзандан “Хүнс сервис” ХХК,

Х.Болорчулуун “Дорнод гурил” ХХК,

Б.Батзориг “Тээвэр ачлал” ХХК зэргээр хөвөрдөг.

Магадгүй зээлийг ном журмаар олгоогүй сайд асан Б.Батзоригийн буруу ч хууль зөрчиж зээл авсан гишүүдэд ямар хариуцлага хүлээлгэх вэ гэдгийг Ерөнхий сайдаас асуумаар байна. Зээл тараасныг нь шалгаж болж байна. Гэвч бага хүүтэй зээл авахын тулд гишүүний бүрэн эрхээ барьцаалж, дэнчин тавьсан увайгүй ЖДҮ-чин гишүүдээ хэдий болтол хаацайлах юм бэ сайд аа. Та намын даргын хувьд зээлээ эргэн төлөөгүй, хулгайч гишүүдийг ирэх сонгуульд нэр дэвшүүлэхгүй гэж мэдэгдсэн удаатай. Тэгвэл ЖДҮ-г самарсан гишүүд тань тойргоо усалж явна. Бүр олон зуугаар нь царцаа нүүлгэсэн мэдээлэл ч байна. Ийм байхад та шударга сайд нэрийг зүүж чадна гэж үү?

Б.Лхам