УИХ-ын чуулганы өнөөдрийн хуралдаанаар Засгийн газраас гаргасан хүн амын ажлын байрыг хамгаалах, эдийн засгийг идэвхжүүлэх, ААН-ийн орлогын албан татвараас хөнгөлөх, гаалийн албан татвараас чөлөөлөх, Ажилгүйдлийн даатгалын сангаас дэмжлэг үзүүлэх, хүн амын НДШ, ХАОАТ-ыг чөлөөлөх зэрэг багц хуулийн төслийг хэлэлцэж байна.

Д.Эрдэнэбат: Засгийн газар долоон хуульд өөрчлөлт оруулах замаар цаг зуурын арга хэмжээ авч байна. Уг нь төсвийн тодотгол, мөнгөний бодлогын арга хэмжээний талаар биш бол цогц арга хэмжээ гэж үзэх боломжгүй. Мэдрэгдэхүйц дэмжлэг гэж харагдахгүй байна. Орлого байхгүй бол НДШ, ХАОАТ гэж байхгүй. Засгийн газар хариуцлагагүй хандаж болохгүй. Хамгийн гол нь экспортын орлогыг онцгой анхаарах хэрэгтэй. Тавантолгой зурагтаар реклам цацаж байгаагаас биш бодит байдал дээр юу болж байгааг мэдэх хүн алга. Малчдад амалсан амлалтаа хэзээ биелүүлэх юм бэ. Хөгжлийн банк зээл олгоно гээд байвал хууль зөрчсөн асуудал болно шүү.

Ч.Хүрэлбаатар: Хөгжлийн банк Сангийн яаманд шилжиж ирээгүй. Ноолуурын хувьд Засгийн газраас 300 тэрбум төгрөгийн эх үүсвэр шийдэж өгсөн. Энэ нь Хөгжлийн банкнаас шийдвэрлэгдэнэ. Долоон арга хэмжээг боловсруулахдаа бусад улс оронд авч хэрэгжүүлж байгаа арга хэмжээтэй харьцуулж судалж байж хийсэн.

НДШ-ийг зургаан сараар төлөхгүй гэдэг нь 640 мянган ажилтантай ААН-д шууд нөлөөлж байгаа юм. Энэ бол үнэхээр чухал.

НДШ тухайн компани, ажилтныхаа ирээдүйн баталгааг хангадаг. Энэ арга хэмжээний ач холбогдлыг бууруулж хэрэггүй байх. Экспортыг дэмжих чиглэлээр энэ сарын 6-ны байдлаар нүүрс ачсан 211 машин гарсан. Анх гарсан 30, 40 машиныг бодвол энэ тоо өсч байгаа.

Б.Лхам