УИХ-ын чуулганы өнөөдрийн хуралдаанаар Засгийн газраас гаргасан ажлын байрыг хамгаалах, эдийн засгийг идэвхжүүлэх, ААН-ийн орлогын албан татвараас хөнгөлөх, гаалийн албан татвараас чөлөөлөх, Ажилгүйдлийн даатгалын сангаас дэмжлэг үзүүлэх, хүн амын НДШ, ХАОАТ-ыг чөлөөлөх зэрэг багц хуулийн төслийг хэлэлцэж байна. Энэ үеэр УИХ-ын гишүүд байр сууриа илэрхийллээ.

Д.Ганболд: Манай улс цэцэрлэг, сургуулийн үйл ажиллагааг зогсоох зэргээр хөл хорионы алхам хийсний үр дүнд халдвар холуур өнгөрсөн нь сайшаалтай. Ялангуяа төсвийн бүх байгууллага зогсонги байдалд байна. Сангийн яам төсвийн хэмнэлт, тэвчиж болох зардал, шаардлагатай эд хогшил авахаар төсөвлөгдсөн зардлаа хэмнэж, хэн нэгнээс тусламж авахгүйгээр өөрийнхөө нөөц боломжийг ашиглах бололцоо бий. Дэлхийн олон улсын эдийн засаг хямарсан. Эдийн засгийг хөдөлгөж байгаа гол зүйл нь нефт шатахуун. Түлшний зардал хямдарсан энэ үед нөөцөлж авах нь эдийн засгийн тогтвортой авч явах бодлого болох болов уу гэж харж байна.

Ч.Хүрэлбаатар: Төсвийн тухай хуульд зааснаар төсвийн хэмнэлтийн горимд Засгийн газар хоёрдугаар сарын 19-ээс эхлэн шилжсэн. Одоогоос 40-өөд хоногийн өмнө гэсэн үг. Зардлуудыг ач холбогдлоор нь ангилан зарцуулж байгаа. Эмнэлгийн хэрэгсэл, онцгой байдал, тэтгэвэр тэтгэмжийг цаг хугацаанд олгоод явж байна. Харин санхүүжилтийг бүрэн зогсоосон буюу хурал зөвлөгөөн, тавилга худалдан авах, томилолтын зардал зэргээр тэвчиж болох бүх зардлаа хэмнэж байна.

 Төсвийн тухай хууль өөрөө нэлээд уян хатан хийгдсэн учраас Засгийн газар бүрэн эрхийнхээ хүрээнд тэвчиж болох бүх зардлаа хэмнэж байна. Монгол Улс шатахууны нөөцийг аж ахуйн нэгжүүдэд үүрэг өгөх замаар бүрдүүдэг. Бүх арга хэмжээг аваад явж байгаа. Өнөөдөр дэлхийн зах зээл дээр халдвартай холбоотойгоор нефтийн үнэ унасан. Иргэдийн хөдөлгөөн татарсан учраас бүтээгдэхүүний эрэлт буурсан. Улмаар түүхэндээ байхгүй хямд үнэ бий болсон.

Б.Лхам