“Амар” зочид буудалд 21 хоног тусгаарлагдсан иргэд хүүхдийн бантан өгдөггүй, хоолны шим тэжээл тааруу, зарим иргэд уургийн дутагдал орсон зэргээр мэдээлэл өгсөн билээ. Бид энэ талаар тухайн иргэдээс тодруулж уншигчдад хүргэсэн. Тэгвэл энэ удаа тус буудлыг ахлах тогооч болон үйлчилгээ хариуцсан албаны даргаас үнэхээр тийм зүйл болсон эсэхийг тодрууллаа.

Ахлах тогооч: ТУСГААРЛАГДСАН ИРГЭДЭД УОК-ООС БАТАЛСАН ЦЭСИЙН ДАГУУ ХООЛ ОЛГОСОН

-Танай зочид буудалд тусгаарлагдсан иргэд шим тэжээлгүй, махны орц багатай хоол өгсөн гэж гомдолсон. УОК-оос баталсан цэсийн дагуу хоол, унд  өгч чадсан уу?

-ОУК-оос өгсөн цэсийг дагаж мөрдсөн мөн буудлын өрөө болгонд ирүүлсэн уг цэсийг байршуулсан. Өдөр бүр 08.00 цагаас өглөөний цай, 11.00 цагт  ясны шөлөн дээр хийсэн өндөг, хулуугаар баяжуулсан бантан, өдөр 13.00 цагт нэг, хоёрдугаар хоол, талх, цайтай, 16.00 цагт аарц эсвэл чацарганы шүүс, орой 18.00 цагт нэг порц хоол, талх, цайтай өгсөн. Манайх чанарын шаардлага хангасан үхэр, хонины шинэ махыг өдөр тутмын хоол, хүнсэнд  хэрэглэсэн.  Бүх хоол батлагдсан хоолны цэсээр технологийн дагуу орц, нормоороо явсан. Тусгааралалтын эхний хоёр өдөр дээр мэр сэр алдаа гарч байсан. Харин гурав дахь өдрөөс үйл ажиллагаа хэвийн болсон. Хоолний талаар янз бүрийн гомдол ирээгүй.  Мөн хагалгаанд ороод ирсэн өндөр настанд өөрийнх нь хүсэлтийн дагуу дан үхрийн махаар өөх, тосгүй хоолоор үйлчилсэн. Энэ мэтчилэн манай зүгээс аль болох уян хатан, эерэг хандлагаар хандаж ажилласан. Мөн монгол хоолны цэсээр захиалгаар хоол хүргэж байсан.

-Бага насны хүүхдүүдэд эхний 14 хоног бантан огт өгөөгүй. Сүүлийн хэдэн хоног өгөөд дараа нь өгөхөө больчихлоо гэж иргэд хэлсэн. УОК-оос 0-5 насны хүүхэд мөнгө төлөхгүй, гэхдээ буудлаас хоол өгөх ёстой гэж хэлсэн. Танай бууплыг хувьд бантан өгсөн гэлээ. Тэгвэл иргэд худлаа хэлсэн болж тараах гээд байна уу?

-Бантангийн хувьд өдөр бүр 11.00 цагаас өгсөн. Гэхдээ түрүүн хэлснээр ясны шөлтэй баяжуулсан бантан. Махтай бантан өгөх, өгөхгүй гэдэг асуудал тусгаарлалтын 12 дахь хоногоос яригдсан юм. 11 дэх өдрөөс тусгаарлах хугацааг дахиад долоо хоног сунгалаа гэж мэдэгдсэн.  10 насны нэг хүүхэд, 0-6 насны долоон хүүхэд байсан. Тиймээс ээж, аавтай нь утсаар холбогдож хоолны амт, чанарын талаар ярилцахад том хүний хоол бол болж байна. Хүүхдүүдэд махтай бантан, нэмэлтээр сүү өгмөөр байна гэсний дагуу үхрийн махтай бантан, сүү болон бүрж шарсан тахиа зэргийг өгсөн. Бид сэтгэлээрээ л хандсан. Хүүхдүүдийн хоолыг үнэ төлбөргүй өгсөн.

-Дээрх мэдээлэл цацагдсаны дараа тусгаарлагдсан иргэдийг мөнгө гэж хараад байна уу гэдэг зүйл яригдсан. Таны болон танай баримт бичгээс үзвэл ингэж дүгнэх нь өрөөсгөл гэж харагдаж байна.

-Тэгэлгүй яах вэ. Бид төрийн шийдвэрийг хүндэтгэсэн. Тиймдээ ч иргэдэд сэтгэлээ гаргаж хоол, унд бэлтгэж өгсөн. Өглөө 07.45 цагт хоолоо бэлдээд гал тогооноосоо гаргадаг. Энэ явцдаа дээжээ авдаг. Гал тогооны үүднээс заалны менежер цахилгаан шат руу хүргэж өгдөг. Цахилгаан шатанд гурван ажилтан аваад давхарууд хариуцсан эмч, онцгой байдлын ажилтанд хүргэдэг. Энэ хүмүүс тусгаарлах өрөөнд байгаа иргэдэд тараалт хийдэг. Ийм олон шат дамжлагатай учир зарим тохиолдолд хоол хөрсөн тохиолдол гарсан байх. Нэг давхарт л гэхэд 40-50 хүн байрлаж байсан. Тойрох хугацаанд их цаг орно шүү дээ. Нисэхээс шууд  14 хоног тусгаарлагдахаар буудалд ирсэн тэдний сэтгэлзүй хүнд байсан байх. Яг тухайн үед долоо хоног сунгасан учир бас бухимдалтай байсан болов уу гэж бодож байна. Бид бас 14 хоног л тусгаарлагдаад  харина гэж бодож байтал дахиад долоо хоног сунгана гэдгийг сонсоод тухайн үедээ бага зэрэг хямарсан шүү. Олон хүнээс янз бүрийн авир гарна шүү дээ. Бусад газрын тусгаарлагдсан иргэдэ боорцогоо шидсэн, мөөгтэй хол идэхгүй зэрэг авир гарсан гэж сонсож байсан. Манайд тусгаарлагдсан хүмүүсийн дотор жирэмсэн хүн байгаагүй. Мэдээж дан ганц гомдол ирээгүй, харин ч олон хүнээс талархлын үг ирж байсан. Тусаарлалтын хугацаа дуусч байсан 21 дэх хоног дээр танай сайт иргэдийн гомдлыг мэдээлсэн. Манайхаан дэлхий нийтэд айдастай энэ хүнд хэцүү  үед эрүүл энхийн төлөө цаг наргүй, сэтгэл зүрхээрээ ажиллаж байгаа төр засаг, салбар салбарын алба хаагчдаа хүндэлж, урмын үг хайрлаарай гэж хэлмээр байна.

“Амар” зочид буудлын тогооч ийм хариулт өгсөн юм.

Харин Борлуулалт, үйлчилгээ хариуцсан албаны дарга Б.Оюунчимэг дараах байр суурийг хэлсэн юм.

Тэрбээр үйлчилгээний талаар “Өнгөрсөн гуравдугаар сарын 16-ны өдөр /Берлин-Москва-Улаанбаатар/ чиглэлийн онгоцоор ирсэн 188 иргэн манай буудалд байрласан. Дараа нь  /Москва-Улаанбаатар/ чиглэлээр хүнс тээвэрлэн ирсэн дөрвөн жолооч нэмэгдэж, нийт 192 иргэн, есөн эмч, ОБЕГ-ын найман алба хаагч,  манайхаас 21 ажилтан нийт 230 хүнийг өрөө байр, хоол хүнсээр ханган ажилласан.

Гуравдугаар сарын 15-ны өдөр гаднаас эмч ирж манай ажилчдад өрөө бүрийн нойлын өрөө мөн хаалга, хаалганы бариулыг тогтмол цэвэрлэх, ариутгал хийх болон нойл бөглөрөх, сангийн бусад асуудал гарахад холбогдох ажилтан яаж орох, өрөөний гадна цэвэрлэгээг хэрхэн хийх  талаар заавар, зөвлөгөө өгсөн. Энэ дагуу эхний хоёр өдөр   ажилласан.  Гурав дахь өдрөөс эхлэн ОБГ-ын ажилтан  өрөөнд орж нойлын цэвэрлэгээ хийхийг хориглосон. Бид өрөөний гадна цэвэрлэгээ, коридор, хана, лифт, аваарын хаалга, шат зэргийг зааврийн дагуу тогтмол цэвэрлэж, ариутгаж  байсан” гэсэн юм.

Харин ямар хүндрэл үүссэн талаар “Тусгаарлагдсан иргэд хувийн бэлтгэлээ өөрсдөө хангаж ирэх байсан. Гэвч зарим иргэн гарын саван, 00-ийн цаас, шампунь, ангижруулагч, оо, сойз зэргийг шаардсан. Бидний зүгээс уг асуудлуудыг дор бүр нь шийдвэрлэж өгсөн. Эргэлт оруулах болсноор энэ асуудал дахин гараагүй.  Тухайн иргэд өөрсдийгөө тусгаарлагдсан гэсэн ойлголтгүй,  эргэлтийн бус цагаар эргэлт авах, буудлын хэмжээний үйлчилгээ нэхэх, “Интэрнет гацаад байна, хурд удаан байна” гэх зэргээр гомдол гаргсан. Түүнчлэн суултуур бөглөрсөн тохиолдол олон гарсан. Бөглөөс гаргахалд хүүхдийн тоглоом хүртэл гарч ирж байсан зэргээр хариуцлагагүй хандлаг олон гарсан. Мөн тусгаарлалтын хугацаа сунгасан нь хүмүүсийн бухимдлыг хүргэсэн байх.

Яг үнэндээ бол бид ч бас эрсдэл дунд ажилласан шүү дээ. Манай ажилчид 21 хоног ажилласан атал шинжилгээнд хамруулаагүйд сэтгэл дундуур байна. Тусгааралалтын хугацаа дуусч иргэд буудлаас гарахдаа “21 хоног хамтдаа сайхан байлаа. Ямар ч байсан хэдүүлээ хүнд үеийн давлаа. Та нартаа баярлалаа” гэх зэргээр талархалын үг хэлэхийг сонсоход урамтай байлаа” гэсэн юм.

Г.Нацаг-Эрдэнэ