Ажил үүргээ гүйцэтгэж яваад машиндаа шатаж амиа алдсан тээвэрчдийн гэргий нар хууль шүүхийн шударга бус шийдвэрийн талаар өнөөдөр мэдээлэл хийлээ. 

Хохирогчийн эхнэр Ж.Туул “2018 оны арваннэгдүгээр сарын 8-9-нд шилжих шөнө Өмнөговь аймгийн Ханбогд сумын нутагт нүүрсний уртын урт тээвэрт явахаар дарааллын төгсгөлд зогсож байсан жолооч машиных нь кабинд гал гарсны улмаас шатаж, 95 хувийн түлэгдэлтэйгээр ГССҮТ-д хүргэгдэн ирээд нас барсан. Би залуу хүнийхээ хувьд нөхрийнхөө хэргийг үнэнээр шийдэгдэнэ гэж итгэж, хүлээсэн. Гэтэл Өмнөговь аймгийн Ханбогд сумын сум дундын цагдаа, прокуророос дөрвөн удаа, Өмнөговь аймгийн ерөнхий прокурор дээр нэг удаа хэрэг хаагдсан. Дараа нь УЕП дээрээс нэг удаа хаагдаж буцсан бөгөөд өнөөдөр дахиад УЕП дээр сүүлийн удаа хянагдахаар ирсэн. Үнэхээр шударгаар хүлээсэн ч болдоггүй юм байна. Гомдолтой байна. Би эцсээ хүртэл явна. Манай гэр бүлийн зүгээс бүх газраас хангалттай нотлох баримт цуглуулсан.

Тухайлбал, 2018 оны арваннэгдүгээр сарын 8-9-нд шилжих шөнө 0663 ӨМА улсын дугаартай "Омогт цагаан шонхор транс" ХХК-ийн автомашиныг Дашдорж жолооч бариад уурхайгаас ачилт хийгээд гарсан гэх баримт нь байна.

Мөн Өмнөговь аймгийн онцгой байдлын газраас “Кабин халаагчаас гал гарсан” гэсэн галын дүгнэлт гаргасан байгаа. Тэр кабин халаагч нь Монгол Улсын стандарт, техникийн зохицуулалтын улсын мэдээллийн нэгдсэн санд бүртгэлгүй болохыг Стандарт хэмжил зүйн төвийн лавлагаа харуулсан. Цааш судлаад үзэхэд тус компани нь маш их хууль зөрчсөн үйлдлүүд гаргасан. Тухайлбал, байнгын ажлын байранд гэрээ хийхгүйгээр ажиллуулсан байгаа юм. Хэрэг бүртгэлт явуулж дуусахдаа 2020 оны нэгдүгээр сарын 4-нд хэрэг бүртгэлийн хэргийг хаах тухай санал хүргүүлж, прокурор хүлээн авч, Өмнөговь аймгийн Ханбогд сумын хяналтын прокурорын зөвлөх н.Төгсбаяр хаасан. Хэргийг хаасан шалтгаан нь “Хүний амь насыг болгоомжгүйгээр хохироох гэмт хэргийн шинжгүй үндэслэлээр хаасугай” гэсэн.

Байнгын ажлын байранд хөдөлмөрийн гэрээ байгуулахгүйгээр ажиллуулчихаад манай ажилтан биш гэж байгаад нь бидний зүгээс гомдолтой байна. Над шиг ингэж хохирсон маш олон эмэгтэй, олон гэр бүл байгаа. Тэд ингэж хөөцөлдөж явж чаддаггүй. Хүүхдүүдээ хараад амьдралаа авч явах гээд боломжгүй байдаг. Би харин хаалгахгүй, эцсээ хүртэл тэмцэнэ" гэлээ.

А.Сүх